រដ្ឋាភិបាលបាននិយាយកាលពីថ្ងៃព្រហស្បតិ៍ថា អ្នករត់ពន្ធមនុស្សដែលគេសង្ស័យ នឹងប្រឈមនឹងការទប់ស្កាត់យ៉ាងធ្ងន់ធ្ងរ ក្រោមច្បាប់ថ្មី ក្នុងប្រទេសអង់គ្លេស ខណៈដែលខ្លួនបង្កើនកិច្ចប្រឹងប្រែង ដើម្បីប្រយុទ្ធប្រឆាំងនឹងការធ្វើទេសន្តរប្រវេសន៍ខុសច្បាប់ និងពង្រឹងសន្តិសុខតាមព្រំដែន។

សេចក្តីថ្លែងការណ៍ បានបន្ថែមថា អ្នកដែលសង្ស័យទាំងនោះ នឹងត្រូវប្រឈមមុខនឹងការហាមឃាត់ការធ្វើដំណើរ ការកាត់ដាច់ប្រព័ន្ធផ្សព្វផ្សាយសង្គម និងការរឹតបន្តឹងលើការប្រើប្រាស់ទូរស័ព្ទ ដើម្បីជួយរដ្ឋាភិបាលក្នុងការ«រុះរើបណ្តាញឧក្រិដ្ឋកម្មអន្តោប្រវេសន៍ ដែលមានអង្គការចាត់តាំង»។ 

រដ្ឋមន្ត្រីមហាផ្ទៃ Yvette Cooper បានថ្លែងថា៖«យើងនឹងផ្តល់អំណាចឲ្យការអនុវត្តច្បាប់កាន់តែរឹងមាំដែលពួកគេត្រូវការដើម្បីបន្ត និងបញ្ឈប់បណ្តាញក្រុមជនខិលខូចបន្ថែមទៀត» ដោយពណ៌នាអំពីសន្តិសុខព្រំដែនថា ជាមូលដ្ឋានគ្រឹះមួយនៃ «ផែនការសម្រាប់ការផ្លាស់ប្តូរ»របស់រដ្ឋាភិបាលនាពេលថ្មីៗនេះ។

នាយករដ្ឋមន្ត្រី Keir Starmer ដែលត្រូវបានជាប់ឆ្នោតឡើងកាន់តំណែងកាលពីខែកក្កដា បានផ្តល់អាទិភាពដល់ការដោះស្រាយការធ្វើទេសន្តរប្រវសន៍ខុសច្បាប់ ដោយបង្ក្រាបក្រុមជនអន្ធពាលដែលរត់ពន្ធមនុស្សឆ្លងកាត់ច្រកអង់គ្លេស ជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក ចូលទៅក្នុងចក្រភពអង់គ្លេសពីប្រទេសបារាំង។

យោងតាមទិន្នន័យរបស់រដ្ឋាភិបាល បានឲ្យដឹងថា មនុស្សជាង ៣៦.៨០០នាក់ បានធ្វើផ្លូវឆ្លងកាត់ដ៏គ្រោះថ្នាក់ ដែលនឹងមកដល់ចក្រភពអង់គ្លេស ក្នុងឆ្នាំ ២០២៤ ដែលបានកើនឡើង ២៥ភាគរយ បើធៀបទៅនឹងឆ្នាំ ២០២៣។ មនុស្សរាប់សិបនាក់ បានស្លាប់ដោយការប៉ុនប៉ងធ្វើដូច្នេះ ដោយអង្គការសប្បុរសធម៌ក្រុមប្រឹក្សាជនភៀសខ្លួន បានចាត់ទុកឆ្នាំ ២០២៤ ជាឆ្នាំដែលមានមនុស្សស្លាប់ច្រើនបំផុត ក្នុងកំណត់ត្រាសម្រាប់ការឆ្លងកាត់ផ្លូវដ៏គ្រោះថ្នាក់បែបនេះ។