ប្រធានាធិបតីអាមេរិក លោក Joe Biden បាននិយាយថា មន្ត្រីអនុវត្តច្បាប់កំពុងស៊ើបអង្កេតពីទំនាក់ទំនងដែលអាចមាន រវាងការវាយប្រហារ នៅទីក្រុង New Orleans (NOLA) ដែលបានបណ្តាលឲ្យមនុស្ស ១៥នាក់ស្លាប់ និងការផ្ទុះរថយន្ត Tesla Cybertruck នៅខាងក្រៅសណ្ឋាគាររបស់ប្រធានាធិបតីជាប់ឆ្នោត លោក Donald Trump ដែលមានឈ្មោះ Trump International Hotel ក្នុងទីក្រុង Las Vegas។

កាលពីល្ងាចថ្ងៃពុធ (ទី១ ខែមករា) ពីកន្លែងសម្រាក Camp David ដោយហៅអំពើហិង្សានៅទីក្រុង New Orleans ថា ជា «ការវាយប្រហារដ៏គួរឲ្យស្អប់ខ្ពើម» លោក Biden បាននិយាយថា៖ «FBI (ការរិយាល័យស៊ើបអង្កេតសហព័ន្ធ) កំពុងដឹកនាំការស៊ើបអង្កេត ដើម្បីកំណត់នូវអ្វីដែលបានកើតឡើង ហេតុអ្វីបានជាវាកើតឡើង និងថា តើមានការគំរាមកំហែងបន្តដល់សុវត្ថិភាពសាធារណៈដែរ ឬយ៉ាងណា»។

គួរបញ្ជាក់ថា នៅទីក្រុង New Orleans បានកើតឡើងនៅព្រឹកព្រលឹមថ្ងៃទី១ ខែមករា នៅពេលដែលជនសង្ស័យឈ្មោះ Shamsud-Din Jabbar អាយុ ៤២ឆ្នាំ បានបើកឡានដឹកទំនិញបុកចូលហ្វូងមនុស្ស នៅសង្កាត់ French Quarter ដោយបន្ថែមពីលើអ្នកស្លាប់ ការបំបុកនោះបានបណ្តាលឲ្យមនុស្សរាប់សិបនាក់រងរបួស។ ឧបករណ៍បំផ្ទុះកែច្នៃចំនួន២ត្រូវបានរកឃើញ នៅក្នុងរថយន្ត រួមជាមួយនឹងទង់របស់ក្រុម ISIS (រដ្ឋឥស្លាម)។ លោក Jabbar ដែលជាអតីតទាហានអាមេរិកកើតនៅរដ្ឋ Texas បានបង្ហោះការគំរាមកំហែងតាមអ៊ីនធឺណិត មុនពេលធ្វើការវាយប្រហារ។ ជនបង្កហេតុត្រូវបានសម្លាប់ អំឡុងការបាញ់ប្រហារជាមួយនគរបាល។

នៅទីក្រុង Las Vegas រថយន្ត Cybertruck បានផ្ទុះនៅជិតសណ្ឋាគាររបស់លោក Trump បណ្តាលឲ្យមនុស្ស ៧នាក់ រងរបួសស្រាល ហើយអ្នកបើកបរស្លាប់ ក្នុងហេតុការណ៍នេះ។ អ្នកស៊ើបអង្កេតកំពុងស្វែងរកការមានទំនាក់ទំនងណាមួយ រវាងហេតុការណ៍ទាំង ២នេះ ប៉ុន្តែរកមិនឃើញការជាប់ពាក់ព័ន្ធច្បាស់លាស់ឡើយ មកទល់ពេលនេះ។ 

ហេតុការណ៍ឆ្នាំថ្មីទាំង ២នេះ បានធ្វើឲ្យមានការព្រួយបារម្ភកាន់តែខ្លាំងឡើងៗ អំពីសន្តិសុខជាតិ ក្នុងរយៈជាច្រើនសប្តាហ៍ មុនពិធីចូលកាន់តំណែងអាណត្តិទី២ របស់លោក Trump។ លោក Biden បានជំរុញឲ្យមានការអត់ធ្មត់ ខណៈដែលការស៊ើបអង្កេត នៅតែបន្តមាន៕