កងកម្លាំងរក្សាសន្តិភាពរបស់អង្គការសហប្រជាជាតិនៅក្នុងប្រទេសលីបង់ នៅថ្ងៃព្រហស្បតិ៍នេះ បានសម្តែងការព្រួយបារម្ភចំពោះការខូចខាតដែលកំពុងបន្ត» ធ្វើឡើងដោយកងកម្លាំងអ៊ីស្រាអែល នៅភាគខាងត្បូងប្រទេសលីបង់ បើទោះបីជាមានបទឈប់បាញ់ក្នុងសង្គ្រាម ជាមួយក្រុមហេសបូឡាក៏ដោយ។

បទឈប់បាញ់ បានចូលជាធរមាន នៅថ្ងៃទី ២៧ ខែវិច្ឆិកា ប្រហែលពីរខែ បន្ទាប់ពីអ៊ីស្រាអែល បានបង្កើនយុទ្ធនាការទម្លាក់គ្រាប់បែករបស់ខ្លួន ហើយក្រោយមក បានបញ្ជូនកងទ័ពចូល ទៅក្នុងប្រទេសលីបង់ បន្ទាប់ពីជិតមួយឆ្នាំនៃការបាញ់តគ្នាឆ្លងព្រំដែន ដែលបានបង្កឡើង ដោយក្រុមហេសបូឡា ជុំវិញសង្រ្គាមនៅតំបន់ហ្កាហ្សា។

ចាប់តាំងពីពេលនោះមក ភាគីជម្លោះ បានចោទគ្នាទៅវិញទៅមកពីបទរំលោភលើបទឈប់បាញ់។

នៅក្រោមកិច្ចព្រមព្រៀងឈប់បាញ់ កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់(UNIFIL) និងកងទ័ពលីបង់ ត្រូវដាក់ពង្រាយឡើងវិញ នៅភាគខាងត្បូងលីបង់ ក្បែរព្រំដែនអ៊ីស្រាអែល ខណៈដែលកងកម្លាំងអ៊ីស្រាអែល បានដកចេញ ក្នុងរយៈពេលជាង ៦០ថ្ងៃ។