តុលាការធម្មនុញ្ញរបស់ប្រទេសកូរ៉េខាងត្បូង បានប្រារព្ធពិធីចូលកាន់តំណែង សម្រាប់ចៅក្រមថ្មីចំនួន ២រូប នាថ្ងៃព្រហស្បតិ៍ (ទី២ ខែមករា) នេះ ដោយការតែងតាំងនេះ កើតមានឡើងនៅមុនពេលមានការជំនុំជម្រះក្ដីរបស់លោកប្រធានាធិបតី Yoon Suk Yeol បន្ទាប់ពីលោកត្រូវបានចោទប្រកាន់ទម្លាក់តំណែងកាលពីខែមុន។

លោក Cho Han-chang និងលោកស្រី Jung Gye-seon ត្រូវបានជ្រើសរើសតែងតាំងដោយប្រធានាធិបតីស្តីទី លោក Choi Sang-mok កាលពីថ្ងៃអង្គារ (ទី៣១ ខែធ្នូ)។ ពិធីចូលកាន់តំណែងរបស់អ្នកទាំង២ នៅថ្ងៃព្រហស្បតិ៍នេះ នាំឲ្យចំនួនសមាជិកចៅក្រមឡើងដល់ ៨នាក់ហើយ។

គួរបញ្ជាក់ថា តុលាការគ្រោងនឹងសម្រេចជោគវាសនាទាំងរបស់លោក Yoon និងនាយករដ្ឋមន្ត្រី លោក Han Duck-soo ដែលក្លាយជាប្រធានាធិបតីស្តីទីទី១ បន្ទាប់ពីមានការចោទប្រកាន់លើលោក Yoon ជុំវិញថា តើត្រូវបញ្ចប់តំណែងរបស់ឥស្សរជនទាំង២ ទាំងស្រុងតែម្ដង ឬផ្ដល់សិទ្ធិអំណាចដល់ពួកគេវិញ។

រដ្ឋធម្មនុញ្ញរបស់ប្រទេសកូរ៉េខាងត្បូង តម្រូវឲ្យមានចៅក្រមចំនួន ៦រូប ក្នុងចំណោមសមាជិក ៩រូប យល់ព្រមលើការបញ្ចប់តំណែងប្រធានាធិបតីដែលត្រូវបានចោទប្រកាន់៕