នគរបាលបាល នៅថ្ងៃព្រហស្បតិ៍ (ទី២ ខែមករា) នេះ បានប្រាប់ឲ្យដឹងថា យានដ្រូនក្រោមទឹកដែលសង្ស័យថា មកពីប្រទេសចិន ត្រូវបានរកឃើញក្នុងដែនទឹក នៅភាគកណ្តាលប្រទេសហ្វីលីពីន ដោយព្រមានពី «ផលប៉ះពាល់សន្តិសុខជាតិដែលអាចមាន»។

របាយការណ៍របស់នគរបាល បានឲ្យដឹងថា អ្នកនេសាទ ៣នាក់ បានប្រទះឃើញយានដ្រូន កាលពីថ្ងៃចន្ទ (ទី៣០ ខែធ្នូ) នៅចម្ងាយប្រហែល ៩គីឡូម៉ែត្រ ពីឆ្នេរ San Pascual ក្នុងខេត្ត Masbate។

គួរបញ្ជាក់ថា ប្រទេសហ្វីលីពីន និងចិន បានប៉ះទង្គិចគ្នាជាច្រើនឆ្នាំមកហើយ ជុំវិញសិទ្ធិគ្រប់គ្រងដែនទឹក នៅសមុទ្រចិនខាងត្បូង ក៏ដូចជាការកាន់កាប់តំបន់ថ្មប៉ប្រះទឹក និងកូនកោះតូចៗ។ ប្រទេសចិនទាមទារស្ទើរតែទាំងស្រុងលើតំបន់សមុទ្រនេះ ដោយបដិសេធការទាមទាររបស់គូប្រជែងពីប្រទេសផ្សេងទៀត និងសេចក្តីសម្រេចអន្តរជាតិ ដែលថា ការអះអាងរបស់ខ្លួនមិនមានមូលដ្ឋានផ្លូវច្បាប់។

ស្នងការនគរបាលប្រចាំតំបន់ លោក Andre Dizon បានប្រាប់សារព័ត៌មាន AFP ថា យានដ្រូនពណ៌លឿងមានអក្សរ «HY-119» ត្រូវបានប្រទះឃើញអណ្តែតក្នុងសមុទ្រ មុនពេលត្រូវបានបញ្ជូនទៅអាជ្ញាធរ។ យានដ្រូននេះមានប្រវែងប្រហែល ២ម៉ែត្រ និងរាងជាគ្រាប់បែកវាយប្រហារមានព្រុយ៕