ប្រព័ន្ធផ្សព្វផ្សាយរដ្ឋ KCNA កាលពីថ្ងៃពុធ (ទី១ ខែមករា) បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) និងកូនស្រីរបស់លោក ជូ អេ (Ju Ae) បានចូលរួមក្នុងព្រឹត្តិការណ៍ប្រារព្ធពិធីស្វាគមន៍ឆ្នាំថ្មីឆ្នាំសកល ដែលមានទាំងបាញ់កាំជ្រួចភ្ញី និងការសម្តែងរាំលើទឹកកកផងដែរ។

រូបថតពីប្រព័ន្ធផ្សព្វផ្សាយរដ្ឋ បានបង្ហាញថា មន្ត្រីជាន់ខ្ពស់កូរ៉េខាងជើង បានចូលរួមជាមួយមេដឹកនាំរូបនេះ ដើម្បីមើលព្រឹត្តិការណ៍អបអរឆ្នាំថ្មី។ មិនមានការលើកឡើងពីសុន្ទរកថាណាមួយរបស់លោក គីម នោះទេ។

សារព័ត៌មាន KCNA ក៏បានឲ្យដឹងផងដែរថា លោក គីម បានទទួលសាររីករាយឆ្នាំថ្មីពីប្រមុខរដ្ឋជាច្រើន ក្នុងនោះរួមទាំងប្រធានាធិបតីចិនផងដែរ បើទោះបីជាសារព័ត៌មាននេះមិនបានលើកពីឈ្មោះលោក ស៊ី ជីនពីង (Xi Jinping) ឬបង្ហាញព័ត៌មានលម្អិតបន្ថែមក៏ដោយ។ ប្រព័ន្ធផ្សព្វផ្សាយនេះ ក៏មិនបានបង្ហាញនោះដែរថា តើលោក គីម បានផ្ញើសារស្វាគមន៍ទៅកាន់លោក ស៊ី វិញដែរ ឬអត់។

ការបង្ហាញនូវសារមិនច្បាស់លាស់ពីប្រព័ន្ធផ្សព្វផ្សាយរដ្ឋនេះ ផ្ទុយទៅនឹងការរៀបរាប់របស់សារព័ត៌មាន KCNA អំពីការផ្ញើសារទៅវិញទៅមករបស់លោក គីម ជាមួយប្រធានាធិបតីរុស្ស៊ី លោក Vladimir Putin កាលពីថ្ងៃមុន ដោយបានលើកឡើងថា លោក គីម បានសន្យាពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរបស់ប្រទេសលោកជាមួយរុស្ស៊ី នៅក្នុងលិខិតមួយផ្ញើជូនលោក Putin៕