ប្រជាពលរដ្ឋកូតឌីវ័រនៅក្នុងទីក្រុង Abidjanបានស្វាគមន៍ការសម្រេចចិត្តរបស់លោកប្រធានាធិបតី Alassane Ouattara ក្នុងការបញ្ចប់វត្តមានយោធាបារាំងនៅក្នុងប្រទេសរបស់ពួកគេ ខណៈពេលដែលពលរដ្ឋខ្លះទៀត បានព្រមានប្រឆាំងនឹងការផ្លាស់ប្តូរលឿនៗនៅក្នុងទំនាក់ទំនងរបស់ប្រទេសនៅអាហ្វ្រិកខាងលិចមួយនេះ ជាមួយអតីតអាណានិគមរបស់ពួកគេ ។

លោក Ouattara បានប្រកាសកាលពីថ្ងៃអង្គារថា កងកម្លាំងបារាំង នឹងត្រូវដកចេញពីប្រទេសកូតឌីវ័រ ជាការបន្តការចាកចេញយោធាបារាំងពីតំបន់មួយនេះ ។ បារាំងកំពុងពិចារណាលើការកាត់បន្ថយវត្តមានយោធារបស់ខ្លួននៅបណ្តាប្រទេសអាហ្វ្រិកខាងលិច និងអាហ្វ្រិកកណ្តាលមកនៅ ៦០០នាក់ ពីចំនួន ២.២០០នាក់ ។

ពលរដ្ឋមួយចំនួន បានកោតសរសើរដល់វិធីសាស្រ្តការទូតរបស់លោក Ouattara ដោយពួកគេយល់ឃើញថា ចំណាត់ការបែបនេះ គឺទាន់ពេលវេលា ។ ការប្រកាសបែបនេះ បានកើតមានឡើងបន្ទាប់ពីការដកយោធាបារាំងស្រដៀងគ្នាពីប្រទេសមាលី ប៊ូគីណាហ្វាសូ និងប្រទេសនីហ៊្សេ ស្របពេលមានផ្នត់គំនិតប្រឆាំងបារាំង ។

បើទោះបីជាមានផែនការដកទ័ពយ៉ាងណាក្តី ពលរដ្ឋកូតឌីវ័រមួយចំនួន ទទួលស្គាល់តម្រូវការសម្រាប់ជំនាញការបារាំងលើបច្ចេកវិទ្យា និងសន្តិសុខ ជាពិសេសគឺការងារប្រឈមក្នុងតំបន់ដូចជាការគំរាមកំហែងអំពើហិង្សាពីក្រុមជីហាដ ៕