ក្រុមមន្រ្តីនិយាយថា ក្រុមអ្នកស៊ើបអង្កេតករណីធ្លាក់យន្តហោះជើងហោះហើរ 2216របស់ក្រុមហ៊ុនអាកាសចរណ៍ Jeju Airនៅកូរ៉េខាងត្បូង បានស្រង់ទិន្នន័យដំបូងពីប្រអប់ខ្មៅមួយក្នុងចំណោមប្រអប់ខ្មៅរបស់យន្តហោះ ។

លោក Joo Jong-wan គឺជាអនុរដ្ឋមន្រ្តីអាកាសចរណ៍ស៊ីវិលកូរ៉េខាងត្បូង និយាយថា ការស្រង់ដំបូងនៃទិន្នន័យពីប្រអប់ខ្មៅបន្ទប់អ្នកបើកបរ បានបញ្ចប់រួចហើយ ។

លោកបន្តថា ផ្អែកលើទិន្នន័យដំបូងមួយនេះ ពួកយើងមានគម្រោងចាប់ផ្តើមបំប្លែងវាទៅជាសំឡេង ។

លោក Joo បាននិយាយទៀតថា ប្រអប់ខ្មៅទី ២របស់យន្តហោះ នឹងត្រូវបញ្ជូនទៅកាន់សហរដ្ឋអាមេរិកសម្រាប់ការវិភាគ ខណៈដែលក្រុមស៊ើបអង្កេតក្នុងស្រុកមិនអាចស្រង់ព័ត៌មានបាន ដោយសារវារងការខូចខាត អំឡុងពេលធ្លាក់ ។

សូមបញ្ជាក់ថា ជើងហោះហើរ 2216បានធ្លាក់នៅអាកាសយានដ្ឋានអន្តរជាតិ Muan ស្ថិតនៅចម្ងាយ ២៩០គ.មភាគនិរតីទីក្រុងសេអ៊ូល កាលពីព្រឹកថ្ងៃអាទិត្យ ដោយបានសម្លាប់មនុស្ស ១៧៩នាក់ ក្នុងចំណោមមនុស្ស ១៨១នាក់នៅលើយន្តហោះ ។

ការធ្លាក់យន្តហោះនេះដែរ គឺជាគ្រោះមហន្តរាយអាកាសចរណ៍ដ៏អាក្រក់បំផុតមិនធ្លាប់ដែលមានលើទឹកដីកូរ៉េខាងត្បូង ហើយនិងជាឧបទ្ទេវហេតុស្លាប់មនុស្សច្រើនបំផុតពាក់ព័ន្ធនឹងក្រុមហ៊ុនអាកាសចរណ៍កូរ៉េខាងត្បូង ចាប់តាំងពីយន្តហោះ Boeing 747 របស់ក្រុមហ៊ុនអាកាសចរណ៍កូរ៉េ បានធ្លាក់លើជើងភ្នំនៅកោះ Guam របស់សហរដ្ឋអាមេរិក កាលពីឆ្នាំ ១៩៩៧ ដោយបានសម្លាប់មនុស្ស ២២៨នាក់ ៕