​អ៊ីរ៉ង់៖ អ៊ីរ៉ង់​បាន​និយាយ​ថា ខ្លួន​នឹង​បន្ត​កិច្ចចរចា​ពហុភាគី​ឡើងវិញ​នៅ​ថ្ងៃ​ទី​២៩ ខែ​វិច្ឆិកា​ក្នុង​ទីក្រុង​វី​យ៉ែ​ន​របស់​ប្រទេស​អូទ្រីស ក្នុង​គោល​បំណង​ស្រោចស្រង់​ឡើងវិញ​នូវ​កិច្ចព្រមព្រៀង​នុយក្លេអ៊ែរ​របស់​ប្រទេស​នេះ ​ជាមួយ​មហាអំណាច​ពិភពលោក​។​

​អនុរដ្ឋមន្ត្រី​ការបរទេស​អ៊ីរ៉ង់លោក Ali Bagheri Kani ដែល​បាន​ក្លាយ​ជា​ប្រធាន​អ្នកចរចា​របស់​ទីក្រុង​តេ​អេ​រ៉ង់ កាលពី​ពាក់កណ្ដាល​ខែ​កញ្ញា​បាន​និយាយ​កាលពី​ថ្ងៃ​ពុធ​ថា កាលបរិច្ឆេទ​ត្រូវ​បាន​កំណត់​នៅ​ក្នុង​ការសន្ទនា​តាម​ទូរស័ព្ទ ​ជាមួយ​អ្នក​សម្របសម្រួល​សហភាព​អឺរ៉ុបលោក Enrique Mora។​ ​លោក Bagheri បាន​និយាយ​នៅ​លើ​បណ្ដាញ​សង្គម Twitter ថា ពួក​លោក​បាន​យល់ព្រម​ចាប់ផ្ដើម​ការចរចា​សំដៅ​​លើ​ការ​ដក​ទណ្ឌកម្ម​ខុសច្បាប់ និង​អមនុស្សធម៌​នៅ​ថ្ងៃ​ទី​២៩ ខែ​វិច្ឆិកា​នៅ​ទីក្រុង​វី​យែ​ន ដោយ​សំដៅ​លើ​វិធាន​ការដែល​សហរដ្ឋ​អាមេ​រិក​បាន​ដាក់​លើ​អ៊ីរ៉ង់​ ចាប់​តាំង​ពី​ការ​ដក​ខ្លួន​ជា​ឯកតោភាគី​ចេញពី​កិច្ចព្រមព្រៀង​នុយក្លេអ៊ែរ ដែល​ត្រូវ​បាន​គេ​ស្គាល់​ជា​ផ្លូវការ​ថា​ជាផែន​ការ​រួម​សម្រាប់​សកម្មភាព​គ្រប់​ជ្រុងជ្រោយ (JCPOA) កាលពី​ខែ​ឧសភា ឆ្នាំ២០១៨ ក្នុង​អាណត្តិ​អតីត​ប្រធានាធិបតី​សហរដ្ឋអាមេរិក​លោក Donald Trump។​ ​សេចក្ដីថ្លែងការណ៍​របស់​សហភាព​អឺរ៉ុប​បាន​និយាយ​ថា ​ភាគី​នានា​ដែល​នៅតែ​ជាប់​ពាក់ព័ន្ធ​កិច្ច​ព្រមព្រៀង រួមមាន​ចក្រ​ភព​អង់គ្លេស ចិន បារាំង អាល្លឺម៉ង់ រុស្ស៊ី និង​អ៊ីរ៉ង់​នឹង​ត្រូវ​ចូលរួម​ក្នុង​កិច្ចចរចា​នេះ​៕

អត្ថបទ៖ សុខមាន