ចំណាប់ថ្នូរជនជាតិអ៊ីស្រាអែលម្នាក់ដែលត្រូវបានឃុំខ្លួនដោយក្រុមសកម្មប្រយុទ្ធជីហាតឥស្លាម (IJ) នៅតំបន់ហ្កាហ្សា បានព្យាយាមបញ្ចប់ជីវិតខ្លួនឯង។ នេះបើយោងតាមអ្នកនាំពាក្យរបស់អង្គភាពប្រដាប់អាវុធរបស់ចលនានេះ ដែលបានឲ្យដឹងតាមរយៈការបង្ហោះវីដេអូ នៅលើកម្មវិធីផ្ញើសារ Telegram នាថ្ងៃព្រហស្បតិ៍ (ទី២ ខែមករា) នេះ។

អ្នកនាំពាក្យក្រុម Al Quds Brigades រូបនេះ បានបន្ថែមថា ក្រុមគ្រូពេទ្យមួយក្រុមរបស់អង្គភាពបានធ្វើអន្តរាគមន៍ និងរារាំងរូបគេកុំឲ្យសម្លាប់ខ្លួន តែមិនបាននិយាយលម្អិតបន្ថែមទៀត អំពីអត្តសញ្ញាណ ឬស្ថានភាពបច្ចុប្បន្នរបស់ចំណាប់ថ្នូរនោះឡើយ។ ចំណែកឯអាជ្ញាធរអ៊ីស្រាអែលមិនបានឆ្លើយតបភ្លាមៗនោះទេ ចំពោះសំណើសុំការអត្ថាធិប្បាយ។

គួររំលឹកថា បើយោងតាមរដ្ឋាភិបាលអ៊ីស្រាអែល បានឲ្យដឹងថា ក្រុមសកម្មប្រយុទ្ធដឹកនាំដោយចលនាហាម៉ាសដែលកំពុងគ្រប់គ្រងតំបន់ហ្កាហ្សា បានសម្លាប់មនុស្ស ១.២០០នាក់ និងបានចាប់ខ្លួន ២៥១នាក់ផ្សេងទៀតធ្វើជាចំណាប់ថ្នូរ អំឡុងការវាយប្រហារ នៅភាគខាងត្បូងប្រទេសអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣។ ក្រុមជីហាតឥស្លាមដែលជាសម្ព័ន្ធមិត្តរបស់ក្រុមហាម៉ាស ក៏បានចូលរួមក្នុងការវាយប្រហារនេះផងដែរ។

ហើយយុទ្ធនាការយោធា ដែលអ៊ីស្រាអែលបានចាប់ផ្តើមឡើង ដើម្បីជាការឆ្លើយតប បានសម្លាប់ប្រជាជនប៉ាឡេស្ទីនជាង ៤៥.៥០០នាក់។ នេះបើយោងតាមមន្ត្រីសុខាភិបាល នៅក្នុងដែនដីឆ្នេរមួយនេះ៕