ប្រទេសចិនបានដាក់ទណ្ឌកម្មក្រុមហ៊ុនការពារជាតិអាមេរិកចំនួន ១០ នៅថ្ងៃព្រហស្បតិ៍ (ទី២ ខែមករា) នេះ ជុំវិញការលក់អាវុធទៅឲ្យកោះតៃវ៉ាន់ ដែលជាវិធានការលើកទី២ របស់ខ្លួន ប្រឆាំងនឹងក្រុមហ៊ុនអាមេរិក ជុំវិញបញ្ហានេះ ក្នុងរយៈពេលតិចជាងមួយសប្តាហ៍។

ក្រសួងពាណិជ្ជកម្ម បានប្រកាសនៅថ្ងៃទី២ ខែមករានេះថា ក្រុមហ៊ុនបុត្រសម្ព័ន្ធរបស់ក្រុមហ៊ុន Lockheed Martin, General Dynamics និង Raytheon ដែលបាន «ចូលរួមក្នុងការលក់អាវុធទៅឲ្យកោះតៃវ៉ាន់» ត្រូវបានបញ្ចូលទៅក្នុង «បញ្ជីអង្គភាពដែលមិនគួរឲ្យទុកចិត្ត» របស់ប្រទេសចិន។

ក្រសួងបានឲ្យដឹងទៀតថា ក្រុមទាំងនោះនឹងត្រូវបានហាមឃាត់មិនឲ្យមានសកម្មភាពនាំចូល និងនាំចេញ ឬធ្វើការវិនិយោគថ្មី នៅក្នុងប្រទេសចិនឡើយ ខណៈដែលអ្នកគ្រប់គ្រងជាន់ខ្ពស់របស់ក្រុមហ៊ុន នឹងត្រូវបានហាមឃាត់មិនឲ្យចូលប្រទេស។

គួររំលឹកដែរថា កាលពីថ្ងៃទី២៧ ខែធ្នូឆ្នាំកន្លងទៅ ប្រទេសចិនបានប្រកាសដាក់ទណ្ឌកម្មលើក្រុមហ៊ុនឧស្សាហកម្មយោធាអាមេរិកចំនួន ៧ ដែលក្នុងនោះរួមមានទាំងក្រុមហ៊ុនបុត្រសម្ព័ន្ធរបស់ Boeing គឺ Insitu ផងដែរ ពាក់ព័ន្ធនឹងការផ្ដល់ជំនួយយោធាអាមេរិកដល់កោះតៃវ៉ាន់។

កោះស្វ័យគ្រប់គ្រងមួយនេះ គឺជាចំណុចសំខាន់នៃជម្លោះ រវាងទីក្រុងប៉េកាំង និងវ៉ាស៊ីនតោន។ ប្រទេសចិនបានអះអាងថា កោះតៃវ៉ាន់ គឺជាផ្នែកមួយនៃដែនដីរបស់ខ្លួន ហើយបាននិយាយថា ខ្លួននឹងមិនបោះបង់ការប្រើប្រាស់កម្លាំង ដើម្បីក្រសោបយកកោះនេះឲ្យមកស្ថិតក្រោមការគ្រប់គ្រងរបស់ខ្លួនឡើយ។

ទីក្រុងវ៉ាស៊ីនតោន មិនទទួលស្គាល់កោះប្រជាធិបតេយ្យមួយនេះជាការទូតនោះឡើយ ប៉ុន្តែជាសម្ព័ន្ធមិត្តយុទ្ធសាស្ត្ររបស់ខ្លួន និងជាអ្នកផ្គត់ផ្គង់អាវុធធំជាងគេ។ កាលពីខែធ្នូឆ្នាំមុន ប្រធានាធិបតីអាមេរិក លោក Joe Biden បានយល់ព្រមផ្តល់ជំនួយផ្នែកការពារជាតិចំនួន ៥៧១,៣លានដុល្លារដល់កោះតៃវ៉ាន់៕