ចិន៖ ​កាលពី​ថ្ងៃ​ពុធ ទី៣ ខែ​វិច្ឆិកា ប្រទេស​ចិន​បាន​វាយបក​វិញ​ប្រឆាំង​នឹង​ការរិះគន់​របស់​លោក​ប្រធានាធិបតី​សហរដ្ឋអាមេរិក Joe Biden ដែល​បាន​ចោទប្រកាន់​ទីក្រុង​ប៉េកាំង​ថា​ មិន​បង្ហាញ​ពី​ភាព​ជា​អ្នកដឹកនាំ​បន្ទាប់ពី​លោក​ប្រធានាធិបតី Xi Jinping បាន​រំលង​កិច្ចប្រជុំ​កំពូល​ស្ដីពី​បម្រែបម្រួល​អាកាសធាតុ​លើក​ទី​២៦ ​របស់​អង្គការសហប្រជាជាតិ​ឬ COP26 នៅ​ទីក្រុង Glasgow ក្នុង​ដែនដី​ស្កុ​ត​ឡិន​របស់​អង់គ្លេស។​

​លោក Xi ដែល​ដឹកនាំ​ការ​បញ្ចេញ​ឧស្ម័ន​ផ្ទះ​កញ្ចក់​ដ៏​ធំ​បំផុត​របស់​ភព​ផែន​ដី ដែល​ទទួលខុស​ត្រូវ​ចំ​ពោះ​ការប្រែប្រួល​អាកាសធាតុ មិនដែល​បាន​ធ្វើ​ដំណើរ​នៅ​ខាងក្រៅ​ប្រទេស​ចិន​ទេ ចាប់​តាំង​ពី​ការ​ចាប់ផ្ដើម​នៃ​ជំងឺ​រាតត្បាត​សកល COVID-19 ហើយ​មិនបាន​ចូលរួម​ជាមួយ​មេដឹកនាំ​ពិភពលោក​សម្រាប់ជំនួប​កំពូល COP26 នោះ​ទេ​។​ លោក Biden កាលពី​ថ្ងៃ​អង្គារ​បាន​រិះគន់​ចំ​ៗ​ទៅលើ​មេដឹកនាំ​ចិន និង​រុស្ស៊ីចំពោះ​ការ​មិន​ចូលរួម​កិច្ចប្រជុំ​កំពូល​នេះ​។​ អ្នកនាំពាក្យ​ក្រសួងការបរទេស​ចិន​លោក Wang Wenbin បាន​ឆ្លើយតប​កាលពី​ថ្ងៃ​ពុធ​ថា សកម្មភាព​និយាយ​លាន់​លឺ​ខ្លាំង​ជាង​ពាក្យសម្ដី។​

​លោក​បាន​បន្ថែម​ថា ​អ្វី​ដែល​យើង​ត្រូវការ​ដើម្បី​ដោះស្រាយ​បញ្ហា​បម្រែបម្រួល​អាកាសធាតុ​ គឺ​សកម្មភាព​ជាក់ស្ដែង​ជាជាង​ពាក្យ​ទទេ។ សកម្មភាព​របស់​ចិន​ក្នុង​ការ​ឆ្លើយតប​ទៅ​នឹង​ការប្រែប្រួល​អាកាសធាតុ​គឺជា​ការពិត​។​ ​លោក​ក៏បាន​ចំអក​ឲ្យ​ក្រុង​វ៉ាស៊ីនតោន​ផង​ដែរ​ដោយ​បន្ថែម​ថា សហរដ្ឋអាមេរិក​ដក​ខ្លួន​ចេញពី​កិច្ច​ព្រម​ព្រៀង​ទីក្រុង​ប៉ារីស ក្រោម​ការដឹកនាំ​របស់​លោក Donald Trump បាន​ធ្វើ​ឱ្យ​ប៉ះពាល់​ដល់​អភិបាល​កិច្ច​អាកាសធាតុ​ពិភពលោក និង​ការអនុវត្ត​កិច្ចព្រមព្រៀង​នេះ​៕

អត្ថបទ៖ សុខមាន