យោងតាមការិយាល័យស្ថិតិកណ្តាលដែនដីប៉ាឡេស្ទីន បានឲ្យដឹងថា កុមារចំនួន៣.៥០០នាក់ប្រឈមនឹងការស្លាប់ ដោយសារតែកង្វះអាហារូបត្ថម្ភ និងកង្វះអាហារ នៅតំបន់ហ្កាហ្សា នៅចុងឆ្នាំ ២០២៤។

យោងតាមលក្ខណៈវិនិច្ឆ័យនៃការបែងចែកដំណាក់កាលសន្តិសុខស្បៀងរួម នៃអង្គការតាមដានសកល បានឲ្យដឹងថា បច្ចុប្បន្ន ប្រជាជនតំបន់ហ្កាហ្សាប្រមាណ២២% ប្រឈមកម្រិតដ៏មហន្តរាយនៃអសន្តិសុខស្បៀងធ្ងន់ធ្ងរ ។

វីដេអូ ដែលត្រូវបានផ្តល់ឲ្យដោយអង្គការសហប្រជាជាតិ បង្ហាញគ្លីនិកវេជ្ជសាស្រ្តក្នុងស្រុកនៅតំបន់ហ្កាហ្សាស្ទ្រីប ដំណើរការដោយសមាគម Ard Al-Insan គាំទ្រដោយអង្គការយូនីសេហ្វ ជាកន្លែងដែលគ្រួសារជាច្រើននាំកុមារទៅពិនិត្យសុខភាពសម្រាប់ការខ្វះអាហារូបត្ថម្ភ។

យោងតាមអង្គការសហប្រជាជាតិ បានឲ្យដឹងថា គិតត្រឹមដំណាច់ខែសីហា ឆ្នាំ២០២៤ កុមារប្រមាណ ១៥.០០០នាក់ នៅតំបន់ហ្កាហ្សាស្ទ្រីប បានទទួលរងពីកង្វះអាហារូបត្ថម្ភ ក្នុងនោះមានកុមារចំនួន ២.២៨៨នាក់ ទទួលរង «កង្វះអាហារូបត្ថម្ភធ្ងន់ធ្ងរ»។

ចំនួនប្រជាជននៅតំបន់ហ្កាហ្សា បានធ្លាក់ចុះ ៦% ចាប់តាំងពីសង្រ្គាមជាមួយអ៊ីស្រាអែល ដែលបានចាប់ផ្តើមរយៈពេលជិត១៥ខែកន្លងទៅនេះ ខណៈពលរដ្ឋប៉ាឡេស្ទីនប្រហែល ១០០.០០០នាក់ បានចាកចេញពីតំបន់ហ៊ុមព័ទ្ធមួយនេះ ហើយជាង៥៥.០០០នាក់ ត្រូវបានគេសន្មត់ថាបានស្លាប់ នេះបើយោងតាមរបាយការណ៍ថ្ងៃទី៣១ ខែធ្នូ ពីការិយាល័យស្ថិតិកណ្តាលរបស់ដែនដីប៉ាឡេស្ទីន។