​បាល់ទាត់៖ ​ក្រុម​ជើងឯក​រង UEFA Champions League រដូវ​កាល​មុន Manchester City បាន​ឡើង​មក​ឈរ​លើ​គេ​នៅ​ក្នុង​ពូ​ល A ក្រោយ​យកឈ្នះ​ក្រុម​ភ្ញៀវ​ប៊ែ​ល​ហ្ស៊ិ​ក Club Bruges ៤-១ យប់មិញ​។ ​​Phil Foden បើក​ការ​នាំមុខ​ឱ្យ Man City នៅ​នាទី​ទី១៥ តែ John Stones ភ្លាត់​ចូល​ទី​ខ្លួនឯង ២នាទី​បន្ទាប់ពី​ធ្វើឱ្យ Club Bruges តាម​បាន​ស្មើ​វិញ ១-១​។

​​មិនមាន​អ្វី​ប្រែប្រួល​ទៀតឡើយ​ពោលគឺ​រង់ចាំ​ដល់​វគ្គ​ទី២ នាទី​ទី៥៤ ទើប Manchester City រកបាន​គ្រាប់​នាំមុខ​សាជាថ្មី​ដោយ Riyad Mahrez មុនពេល​ដែល Raheem Sterling បន្ថែម​ការនាំ​មុខ ៣-១ នៅ​នាទី​ទី៧២​។ ​​ខ្សែប្រយុទ្ធ​ប្រេ​ស៊ី​ល Gabriel Jesus ជា​អ្នក​ស៊ុត​គ្រាប់​បង្ហើយ​នៅ​នាទី​ទី៩០+២ ឱ្យ Manchester City យកឈ្នះការប្រកួត​នេះ ៤-១ ឡើងមក​នាំមុខគេ​ក្នុង​ពូ​ល A មាន ៩ពិន្ទុ ខណៈ Club Bruges ឈរ​លេខ៣ មាន ៤ពិន្ទុ​។ ​​ងាក​មក​មួយ​ប្រកួត​ទៀត Paris Saint Germain បាន​ធ្លាក់​មក​លេខ២ វិញ​ក្រោយ​ស្មើ​នៅ​ទឹកដី​អាល្លឺម៉ង់ RB Leipzig ២-២​។ ​​Christopher Nkunku ជា​អ្នក​តែ​ត​បញ្ចូល​ទី​នាំ​មុខមុន​ឱ្យ​ក្រុម​ម្ចាស់ផ្ទះ Leipzig តែ​អតីត​ខ្សែបំរើ Liverpool, Georginio Wijnaldum វាយបក​ពីក្រោយ​ពីរ​គ្រាប់​វិញ​ឱ្យ PSG នាំមុខ ២-១ នៅ​នាទី​ទី២១ និង ៣៩​។

​​PSG បាន​នាំមុខ ២-១ រហូតដល់​ហៀបនឹង​ចប់​ការប្រកួត​ទៅហើយ​តែ ៣​ពិន្ទុ​ក៏ត្រូវ​បាន​លុបចោល​វិញ​នៅពេល Leipzig តាម​ស្មើ​នៅ​នាទី​ទី៩០+១ ដោយ Dominik Szoboszlai​។​ ​​ការប្រកួត​នេះ​មិនមាន​វត្តមាន​ខ្សែប្រយុទ្ធ​អា​ហ្ស​ង់​ទីន Lionel Messi ឡើយ​ដោយសារ​របួស​ក្នុងការ​ប្រកួត​កាលពី​ថ្ងៃ​សុក្រ​ដែល​យកឈ្នះ Lille ២-១​។​ ​​លទ្ធផល​នេះ​ធ្វើឱ្យ​ក្រុម​របស់លោក Mauricio Pochettino ធ្លាក់​មក​លេខ២ វិញ​មាន ៨ពិន្ទុ​ខណៈ Leipzig បន្ត​ឈរ​ក្រោម​គេ​មាន​ត្រឹម ១ពិន្ទុ​អស់​ឱកាស​ទៅ​ជុំ​បន្ត​ហើយ​៕

​អត្ថបទ​៖​នាង សុភា​វុ​ធ