ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា បានផ្តាំផ្ញើដល់​និស្សិត​អាហា​រូបករណ៍​ដែលត្រៀម​ចេញ​ទៅ​សិក្សា​នៅ​ប្រទេស​នូវែល​សេឡង់​ទាំងអស់​ចូល​រួម​ផ្សព្វ​ផ្សាយ​ពី​កិត្យានុភាព​ជាតិ​នានាទៅកាន់ឆាកអន្តរជាតិ។

នៅថ្ងៃទី៣ ខែមករា ឆ្នាំ២០២៥ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា តំណាង​ដ៏ខ្ពង់ខ្ពស់សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា បាន​អនុញ្ញាត​ឱ្យ​ក្រុម​និស្សិត​ជ័យលាភីអាហារូបករណ៍របស់រាជរដ្ឋាភិបាលប្រទេសនូវែលសេឡង់ សម្រាប់ឆ្នាំ​សិក្សា​២០២៥ ចំនួន៣៧នាក់ ចូលជួបសម្តែងការគួសម និងទទួលអនុសាសន៍ណែនាំ មុនពេល​ចេញ​ទៅ​បន្ត​ការសិក្សានៅប្រទេសនូវែលសេឡង់នាពេលខាងមុខ។

នាឱកាសនោះ ឯកឧត្តមកិត្តិសេដ្ឋាបណ្ឌិត ជាម យៀប បានសម្តែងការអបអរសាទរ និង​បង្ហាញ​នូវ​មោទនភាព ព្រមទាំងក្តីសប្បាយរីករាយចំពោះនិស្សិតទាំងអស់ និងក្រុមគ្រួសារ ដែលទទួល​បាន​ជ័យ​លាភីអាហារូបករណ៍របស់រដ្ឋាភិបាលនូវែលសេឡង់ ដែលជាអាហារូបករណ៍​មួយ​មាន​ការ​ប្រកួត​ប្រជែង​កម្រិតខ្ពស់។

ក្នុងនាមរដ្ឋសភា ឯកឧត្តមបណ្ឌិត ជាម យៀប បានសម្តែងនូវអំណរគុណជាខ្លាំងដល់រដ្ឋាភិបាល និង​ប្រជាជននូវែលសេឡង់ដែលបានបន្តការគាំទ្រជាបន្តបន្ទាប់ដល់ការស្តារសេដ្ឋកិច្ច-សង្គម​កម្ពុជា​ ខណៈបច្ចុប្បន្នមាននិស្សិតជ័យលាភីចម្រុះ ទាំងនៅក្នុងស្ថាប័នរដ្ឋ វិស័យឯកជន និង​អង្គការ​សង្គម​ស៊ីវិល បានទៅសិក្សារៀនសូត្រ។

ឯកឧត្តមបណ្ឌិត ជាម យៀប ក៏បានមានប្រសាសន៍​បង្ហាញ​ពី​ស្ថាប័ន​នីតិប្បញ្ញត្តិ​ដល់​ក្រុម​និស្សិត​ទាំង​អស់​បានយល់ដឹង ទាក់ទងនឹងកិច្ចការងារដែលរដ្ឋសភាបានខិតខំបំពេញយ៉ាងសកម្ម ក្នុង​ការ​រួម​ចំណែក​ជាមួយរាជរដ្ឋាភិបាលដើម្បីជំរុញកម្ពុជាឱ្យក្លាយជានីតិរដ្ឋ មានការអភិវឌ្ឍ​រីក​ចម្រើន​ជឿន​លឿន ស្របទៅតាមតួនាទី ភារកិច្ចដូចដែលមានចែងក្នុងរដ្ឋធម្មនុញ្ញ និងបទបញ្ជាផ្ទៃ​ក្នុង​របស់​រដ្ឋសភា​ទៅលើមុខងារនីតិកម្ម ការតាមដានការអនុវត្តច្បាប់ មុខងារពង្រីក និងពង្រឹង​ការ​ទូត​សភា​ជាដើម​។

ជាមួយគ្នានេះ ឯកឧត្តមបណ្ឌិត អនុប្រធានទី១រដ្ឋសភា បានធ្វើការផ្ដាំផ្ញើឱ្យនិស្សិតទាំងអស់ រ​ក្សា​សាមគ្គី​ផ្ទៃ​ក្នុងឱ្យបានល្អប្រសើរ ត្រូវយកចិត្តទុកដាក់ ខិតខំរៀនសូត្រទាំងនៅក្នុងថ្នាក់ និង​ស្វ័យ​រៀន​សូត្រ ក៏ដូចជាការចែករំលែកបទពិសោធន៍ផ្ទាល់ខ្លួនដល់និស្សិត ដែល​មក​ពី​បណ្តា​ប្រទេស​នានា និងទទួលយកបទពិសោធន៍ថ្មីៗល្អៗពីនិស្សិតនានា ដែលជាការ​ឆ្លុះបញ្ចាំង​ពី​វប្បធម៌​នៃ​ការ​ចែក​រំលែក និងការទទួលយក។

ឯកឧត្តមបណ្ឌិត ជាម យៀប ក៏បានផ្ដាំផ្ញើដល់និស្សិតទាំងអស់ សូមជួយផ្សព្វផ្សាយ​ពីចំណុច​វិជ្ជមាន​របស់​ប្រទេសកម្ពុជាឱ្យបានច្រើន រួមមានការអភិវឌ្ឍសង្គម-សេដ្ឋកិច្ច ការរីកចម្រើន​លើ​គ្រប់​វិស័យ​។ លើសពីនេះទៀត ត្រូវជួយផ្សព្វផ្សាយពីតំបន់ទេសចរណ៍នានា ជាពិសេស​ប្រាសាទ​អង្គរ​វត្ត​របស់​កម្ពុជា ក៏ដូចជាជួយទាក់ទាញប្រជាជននូវែលសេឡង់ និងបណ្តា​មិត្ត​ភ័ក្ត្រ​បរទេស​ឱ្យ​គេម​ក​ទស្សនា​ប្រទេសកម្ពុជាឱ្យបានច្រើនថែមទៀត៕ អត្ថបទ៖ សេក ឧត្តម