មន្ត្រីសមត្ថកិច្ចនៅក្នុងទីក្រុងនានារបស់សហរដ្ឋអាមេរិក បានបង្កើនសន្តិសុខកាលពីថ្ងៃព្រហស្បតិ៍ (០២ មករា) បន្ទាប់ពីការវាយប្រហារដ៏កាចសាហាវនៅទីក្រុង New Orleans និងការផ្ទុះរថយន្តនៅខាងក្រៅសណ្ឋាគារ Trump ក្នុងទីក្រុង Las Vegas បានបង្កើនការភ័យខ្លាចនៃការគំរាមកំហែងកាន់តែច្រើនឡើងក្នុងរយៈពេលមួយខែ ដែលពោរពេញទៅដោយព្រឹត្តិការណ៍សាធារណៈទ្រង់ទ្រាយធំ។

នគរបាលនៅទីក្រុងវ៉ាស៊ីនតោន ជាទីនៃពិធីបុណ្យសពរដ្ឋរបស់លោកអតីតប្រធានាធិបតី Jimmy Carter នៅថ្ងៃទី០៩ ខែមករា និងពិធីឡើងកាន់តំណែងរបស់លោកប្រធានាធិបតីជាប់ឆ្នោត Donald Trump នៅថ្ងៃទី២០ ខែមករា បាននិយាយនៅក្នុងសេចក្តីថ្លែងការណ៍មួយថា ពួកគេបានបង្កើនសន្តិសុខនៅទូទាំងទីក្រុង "មុនពេលព្រឹត្តិការណ៍ថ្មីធំៗ" ហើយថាសហគមន៍នឹងមើលឃើញវត្តមាននគរបាលកើនឡើង។

លោក Trump មកពីបក្សសាធារណរដ្ឋ ក៏គ្រោងនឹងរៀបចំ "ពិធីជួបជុំជ័យជម្នះ" ទ្រង់ទ្រាយធំនៅទីលាន Capital One របស់ទីក្រុងវ៉ាស៊ីនតោន នៅថ្ងៃទី១៩ ខែមករា។ ជ័យជម្នះក្នុងការបោះឆ្នោតប្រធានាធិបតីថ្ងៃទី០៥ ខែវិច្ឆិកា របស់ Trump ក៏នឹងត្រូវបញ្ជាក់ដោយសភាអាមេរិក នៅថ្ងៃទី០៦ ខែមករា ដែលជាខួបលើកទី៤ នៃការវាយប្រហារលើវិមានកាពីតូល របស់អាមេរិក ដោយអ្នកគាំទ្ររបស់លោក ក្នុងពិធីដូចគ្នានេះកាលឆ្នាំ២០២១។

ព្រឹត្តិការណ៍ធំៗបែបនេះ ងាយរងគ្រោះណាស់ប្រសិនបើមានការវាយប្រហារកើតឡើង ទោះបីជាមានសន្តិសុខតឹងតែងក៏ដោយ ព្រោះតែទំហំធំនៃកម្មវិធី និងហ្វូងមនុស្សដ៏ច្រើន៕