យោងតាមប្រព័ន្ធផ្សព្វផ្សាយក្នុងស្រុក និងក្រុមអ្នកឃ្លាំមើលសង្គ្រាម បានឱ្យដឹងថា ការបំផ្ទុះជាបន្តបន្ទាប់ បានធ្វើឱ្យរង្គោះរង្គើរ ខេត្ត Aleppo ភាគខាងត្បូងប្រទេសស៊ីរី កាលពីយប់ថ្ងៃព្រហស្បតិ៍ ខណៈ យន្តហោះប្រយុទ្ធរបស់អ៊ីស្រាអែល បានវាយប្រហារលើរោងចក្រផ្នែកការពារជាតិ និងមជ្ឈមណ្ឌលស្រាវជ្រាវនៅទីនោះ។

សារព័ត៌មានក្នុងស្រុក al-Watan Online បានរាយការណ៍ថា ការបំផ្ទុះជាច្រើន បានកើតឡើងនៅក្នុងក្រុង Al-Safira ជាទីតាំងរោងចក្រផ្នែកការពារជាតិ។ របាយការណ៍បាននិយាយបន្ថែមថា ការវាយប្រហារនេះ ក៏បានផ្តោតលើមជ្ឈមណ្ឌលស្រាវជ្រាវវិទ្យាសាស្ត្រមួយកន្លែងនៅជាយក្រុង ផងដែរ។

ក្រុមឃ្លាំមើលសិទ្ធិមនុស្សនៅប្រទេសស៊ីរី ជាអង្គការឃ្លាំមើលសង្គ្រាម មានមូលដ្ឋាននៅចក្រភពអង់គ្លេស បានបញ្ជាក់ថា មានការផ្ទុះធំៗយ៉ាងហោចណាស់ចំនួន៧លើក ដោយនិយាយថា យន្តហោះអ៊ីស្រាអែល បានទម្លាក់គ្រាប់បែកទៅលើទាំងរោងចក្រផ្នែកការពារជាតិ Al-Safira និងមជ្ឈមណ្ឌលស្រាវជ្រាវ។

នៅពុំទាន់មានសេចក្តីរាយការណ៍ភ្លាមៗអំពីអ្នកស្លាប់និងរងរបួសនៅឡើយទេ។ ក្រុមសង្កេតការណ៍បានកត់សម្គាល់ថា ការវាយឆ្មក់ចុងក្រោយនេះ នាំឱ្យចំនួនសរុបនៃការវាយប្រហារតាមអាកាសរបស់អ៊ីស្រាអែលលើទឹកដីប្រទេសស៊ីរីឡើងដល់៤៩៨លើក ចាប់តាំងពីការដួលរលំនៃរដ្ឋាភិបាលរបស់អតីតប្រធានាធិបតីស៊ីរី លោក Bashar al-Assad កាលពីដើមខែធ្នូ ឆ្នាំកន្លងទៅនេះ។