ក្រុមឃ្លាំមើលសង្រ្គាម បាននិយាយកាលពីថ្ងៃព្រហស្បតិ៍ថា យ៉ាងហោចណាស់យុទ្ធជន ២៤នាក់ ដែលភាគច្រើនមកពីក្រុមគាំទ្រដោយទួរគី ត្រូវបានសម្លាប់ នៅក្នុងការប៉ះទង្គិចគ្នាជាមួយកងកម្លាំងប្រជាធិបតេយ្យស៊ីរី (SDF) ដែលដឹកនាំដោយឃើដ នៅក្នុងស្រុក Manbij ភាគខាងជើង។

ក្រុមឃ្លាំមើលសិទ្ធិមនុស្សស៊ីរី បានអះអាងថា អំពើហិង្សានេះ បានសម្លាប់យុទ្ធជនគាំទ្រដោយទួរគីចំនួន ២០នាក់ និងសមាជិកម្នាក់នៃក្រុមប្រឹក្សាយោធា Manbij ដែលមានទំនាក់ទំនងជាមួយកងកម្លាំងប្រជាធិបតេយ្យស៊ីរី (SDF)។

ក្រុមឃ្លាំមើលសិទ្ធិមនុស្សមានមូលដ្ឋាននៅចក្រភពអង់គ្លេសដែលតាមដានស្ថានការណ៍សង្គ្រាម បាននិយាយថា ការប្រយុទ្ធចុងក្រោយបង្អស់ ត្រូវបានបង្កឡើងដោយការវាយប្រហារដោយក្រុមយុទ្ធជនគាំទ្រដោយទីក្រុងអង់ការ៉ា ទៅលើទីក្រុងចំនួនពីរ នៅភាគខាងត្បូងនៃទីក្រុង Manbij ។

ទឹកដីមួយភាគធំនៃភាគខាងជើងស៊ីរី ត្រូវបានគ្រប់គ្រងដោយរដ្ឋបាលដឹកនាំដោយជនជាតិឃើដ ដែលកងទ័ពពិតប្រាកដ SDF គាំទ្រដោយសហរដ្ឋអាមេរិក បានដឹកនាំការប្រយុទ្ធ ដែលបានជួយបណ្តេញក្រុមរដ្ឋឥស្លាមដេស (Daesh) ចេញពីទឹកដីចុងក្រោយរបស់ខ្លួននៅក្នុងប្រទេសស៊ីរី ក្នុងឆ្នាំ ២០១៩។

ប្រទេសទួរគី បានចោទប្រកាន់ផ្នែកសំខាន់នៃកងកម្លាំងប្រជាធិបតេយ្យស៊ីរី (SDF) ដែលជាអង្គភាពការពារប្រជាជន (YPG)ថា មានទំនាក់ទំនងជាមួយគណបក្សពលករ (PKK) ដែលទាំងទីក្រុងវ៉ា ស៊ីនតោន និងទីក្រុងអង់ការ៉ា បានដាក់ក្នុងបញ្ជីខ្មៅថា ជាក្រុមភេរវករ។