សារព័ត៌មាន The Sun បានរាយការណ៍ថា ការប៉ុនប៉ងធ្វើឃាតដោយការបំពុល ត្រូវបានធ្វើឡើងលើអតីតមេដឹកនាំផ្តាច់ការស៊ីរី លោក បាសា អាល់អាសាដ (Bashar al-Assad)។

តាមសេចក្តីរាយការណ៍ មេដឹកនាំស៊ីរីដែលត្រូវបានបណ្តេញចេញពីតំណែងនេះ បានធ្លាក់ខ្លួនឈឺកាលពីថ្ងៃអាទិត្យ នៅទីក្រុងមូស្គូ ជាទីដែលលោក បានស្នាក់នៅ ចាប់តាំងពីការភៀសខ្លួនចេញពីប្រទេសស៊ីរី កាលពីដើមខែធ្នូ។

លោក អាសាដ មានអាយុ ៥៩ឆ្នាំ បានស្នើសុំជំនួយផ្នែកវេជ្ជសាស្រ្ដ បន្ទាប់មកចាប់ផ្តើម «ក្អកខ្លាំង និងស្ទះដង្ហើម»។ នេះបើយោងតាមគណនីអនឡាញ General SVR ដែលត្រូវបានគេជឿថា គ្រប់គ្រងដោយអតីតចារកម្មជាន់ខ្ពស់ នៅប្រទេសរុស្ស៊ី។

គណនីអនឡាញនេះ បានបន្ថែមថា៖ «មានហេតុផលគ្រប់យ៉ាង ដើម្បីជឿថា ការប៉ុនប៉ងធ្វើឃាតមួយ ត្រូវបានធ្វើឡើង។

លោក អាសាដ ត្រូវបានគេព្យាបាលនៅក្នុងផ្ទះល្វែងរបស់ខ្លួន ហើយស្ថានភាពរបស់លោក ត្រូវបានគេនិយាយថា មានស្ថិរភាពកាលថ្ងៃចន្ទ។ គណនីនោះ បានឲ្យដឹងថា លោកត្រូវបានគេបញ្ជាក់ថា បានពុលដោយការធ្វើតេស្តផ្នែកវេជ្ជសាស្ត្រ ដោយមិនបានលើកឡើងពីប្រភពផ្ទាល់ទេ។

ពុំទាន់មានការបញ្ជាក់អំពីព្រឹត្តិការណ៍នេះ ពីរដ្ឋាភិបាលរុស្ស៊ីទេ។