យោធាអ៊ីស្រាអែល បាននិយាយថា ខ្លួនបានវាយប្រហារទៅលើជើងទម្របាញ់រ៉ូកែតជាច្រើនគ្រឿង របស់ក្រុមហេសបូឡា នៅភាគខាងត្បូងប្រទេសលីបង់ កាលពីថ្ងៃព្រហស្បតិ៍ បើទោះបីជាមានបទឈប់បាញ់ដ៏ផុយស្រួយជាមួយក្រុមសកម្មប្រយុទ្ធនេះ ក៏ដោយ។

បទឈប់បាញ់ ដែលបានចូលជាធរមាន នៅថ្ងៃទី ២៧ ខែវិច្ឆិកា ត្រូវបានកត់សម្គាល់ឃើញថា មានការចោទប្រកាន់គ្នាទៅវិញទៅមក អំពីការរំលោភបំពានពីភាគីទាំងពីរ។

យោធាអ៊ីស្រាអែល បានអះអាងថា ការវាយប្រហារកាលពីថ្ងៃព្រហស្បតិ៍ បានកំណត់គោលដៅទៅលើជើងបាញ់រ៉ូកែតរយៈចម្ងាយមធ្យម នៅក្នុងតំបន់ Nabatieh។

ទីភ្នាក់ងារសារព័ត៌មានជាតិផ្លូវការរបស់ប្រទេសលីបង់ បានរាយការណ៍ថា យ៉ាងហោចណា ស់មានការវាយប្រហាររបស់អ៊ីស្រាអែលចំនួនបីលើក នៅក្នុងតំបន់នេះ។ យោធាបាននិយាយនៅក្នុងសេចក្តីថ្លែងការណ៍មួយថា៖«មុនពេលធ្វើការវាយប្រហារ សំណើមួយត្រូវបានបញ្ជូនទៅកងកម្លាំងប្រដាប់អាវុធលីបង់ ដើម្បីឲ្យបញ្ឈប់ការវាយប្រហារដោយរ៉ូកែត ដែលបង្កការគំរាមកំហែងដល់ជនស៊ីវិលអ៊ីស្រាអែល និង...ទាហាន»។

«ជើងទម្របាញ់រ៉ូកែតទាំងនោះ ត្រូវបានវាយប្រហារ បន្ទាប់ពីសំណើមិនត្រូវបានដោះស្រាយដោយកងកម្លាំងប្រដាប់អាវុធលីបង់»។

នៅក្រោមលក្ខខណ្ឌនៃបទឈប់បាញ់នេះ កងទ័ពលីបង់ ត្រូវដាក់ពង្រាយជាមួយកងកម្លាំងរក្សាសន្តិភាពរបស់អង្គការសហប្រជាជាតិ នៅភាគខាងត្បូង ខណៈដែលកងទ័ពអ៊ីស្រាអែល ដកខ្លួនចេញ ក្នុងរយៈពេល ៦០ថ្ងៃ។

ក្រុមហេសបូឡា នឹងដកកងកម្លាំងរបស់ខ្លួន នៅភាគខាងជើងនៃទន្លេ Litani ដែលមានចម្ងាយប្រហែល ៣០ គីឡូម៉ែត្រ (២០ម៉ាយ) ពីព្រំដែន ហើយរុះរើហេដ្ឋារចនាសម្ព័ន្ធយោធារបស់ខ្លួន នៅភាគខាងត្បូង។