ក្រុមស៊ើបអង្កេតកូរ៉េខាងត្បូង បានបញ្ឈប់ការប៉ុនប៉ងរបស់ពួកគេនៅថ្ងៃសុក្រ (០៣ មករា) ក្នុងការចាប់ខ្លួនប្រធានាធិបតីកូរ៉េខាងត្បូង លោក Yoon Suk Yeol ជុំវិញក្រឹត្យច្បាប់អាជ្ញាសឹក ដោយសារតែមានការប្រឈមមុខដាក់គ្នាដ៏តានតឹងជាមួយកម្លាំងសន្តិសុខ និងបាតុករ នៅឯនិវេសនដ្ឋានរបស់លោក។

ការិយាល័យស៊ើបអង្កេតអំពើពុករលួយ (CIO) បាននិយាយនៅក្នុងសេចក្តីថ្លែងការណ៍មួយថា "ទាក់ទិននឹងការអនុវត្តដីកាចាប់ខ្លួនថ្ងៃនេះ គឺមិនធ្វើបានទេ ដោយសារតែការប្រឈមមុខគ្នាជាបន្តបន្ទាប់។ ក្ដីបារម្ភចំពោះសុវត្ថិភាពបុគ្គលិកនៅនឹងទីតាំងនិវេសនដ្ឋាននោះ ជំរុញឱ្យក្រុមការងារសម្រេចចិត្តបញ្ឈប់ប្រតិបត្តិការ"។ 

អាជ្ញាធរបានចូលទៅក្នុងបរិវេណនិវេសនដ្ឋានរបស់លោក Yoon ដើម្បីអនុវត្តដីកាចាប់ខ្លួនដែលមិនធ្លាប់មានពីមុនមក ដោយគេចចេញពីការរារាំងរបស់ហ្វូងបាតុករនៅខាងក្រៅ ប៉ុន្តែត្រូវបានប្រឈមមុខដោយកងកម្លាំងសន្តិសុខប្រធានាធិបតីនៅខាងក្នុង។

គេមិនទាន់ច្បាស់ទេថា តើសេវាសន្តិសុខប្រធានាធិបតី (PSS) ដែលពីមុនធ្លាប់បានរារាំងដីកាឆែរឆេររបស់ក្រុមស៊ើបអង្កេតមិនឱ្យចូលការិយាល័យ និងនិវេសនដ្ឋានផ្លូវការរបស់លោក Yoon បានព្យាយាមបញ្ឈប់មិនឱ្យមានការចាប់ខ្លួននេះឬយ៉ាងណា។ នេះជាលើកទីមួយហើយដែលកូរ៉េខាងត្បូង ស្វះស្វែងចាប់ខ្លួនមេដឹកនាំដែលកំពុងកាន់តំណែង៕