​​រុស្ស៊ី៖ ក្រុម​មន្ត្រី​បាន​និយាយ​ថា យន្តហោះ​ដឹក​ជ​ទំនិញ​ ១​គ្រឿង​របស់​ប្រទេស​បេឡា​រុស​បាន​ធ្លាក់​កាលពី​ថ្ងៃ​ពុធ ខណៈ​ព្យាយាម​ចុះចត​នៅ​ក្នុង​ប្រទេស​រុស្ស៊ី​ភាគ​ខាងកើត​ដែល​បាន​សម្លាប់​មនុស្ស​ទាំងអស់ ​៧​នាក់​នៅលើ​យន្តហោះ​។ ​យន្តហោះ An-12 ដែល​ផលិត​នៅ​សម័យ​សូ​វៀតប្រតិបត្តិការ​ដោយ​ក្រុមហ៊ុន​ដឹកជញ្ជូន​ផ្លូវ​អាកាស Belarusian Grodno បាន​ធ្លាក់ និង​ឆេះនៅ​ជិត​តំបន់ Irkutsk ភាគ​ខាងកើត​ប្រទេស​ស៊ែ​ប​ប៊ី​។

​គណៈកម្មការស៊ើបអង្កេត​របស់​បេឡា​រុស ដែល​ជា​ទីភ្នាក់ងារ​ស៊ើបអង្កេត​ជាន់ខ្ពស់​របស់​រដ្ឋបាន​និយាយ​ថា មាន​មនុស្ស ​៧​នាក់​នៅ​លើយន្តហោះ ហើយ​ពួកគេ​ទាំងអស់​បាន​ស្លាប់​នៅ​ក្នុង​ហេតុការណ៍​ធ្លាក់​យន្តហោះ​នោះ​។​ ​សារព័ត៌មាន​រុស្ស៊ីរាយការណ៍​ថា យន្តហោះ​នេះ​បាន​ធ្លាក់ ខណៈ​ដែល​ព្យាយាម​ចុះចត​លើក​ទី​២ បន្ទាប់ពី​ការប៉ុនប៉ង​ចុះចត​លើ​ដី​លើកដំបូង​បរាជ័យ។ គេ​នៅ​មិនទាន់​ដឹង​ច្បាស់​ទេពី​មូល​ហេតុ​ដែល​បណ្ដាល​ឲ្យ​យន្តហោះ​នេះ​ធ្លាក់។ ​ក្រសួង​សង្គ្រោះ​បន្ទាន់​របស់​រុស្ស៊ី​បាន​និយាយ​នៅ​ក្នុង​សេចក្ដី​ថ្លែង​ការណ៍​បង្ហោះ​នៅ​ក្នុង Telegram ថា យន្តហោះ​នេះ​បាន​បាត់​ចេញពី​ប្រព័ន្ធ​រ៉ា​ដា ខណៈ​ចុះចត​ជិត​ទីក្រុង​មួយ​របស់​ប្រទេស​ស៊ែ​ប​ប៊ី​កាលពី​ថ្ងៃ​ពុធ​។

​ទីភ្នាក់ងារ​ព័ត៌មាន TASS បាន​រាយការណ៍​ថា យន្តហោះ​ដែល​កំពុង​ធ្វើ​ដំណើរ​ពី​ទីក្រុង Yakutsk ទៅកាន់​ទីក្រុង Irkutsk បាន​បាត់​ពី​រ៉ា​ដា​មុន​ពេល​វា​ត្រូវ​បាន​បញ្ជាក់​ថា​ ធ្លាក់​នៅ​ជិត​អាកាសយានដ្ឋាន​ទីក្រុង​ Irkutsk​។ អ្នកដំណើរ​នៅ​លើ​យន្តហោះ​មាន​ជនជាតិ​រុស្សី​ ២​នាក់, អ៊ុយ​ក្រែ​ន ២​នាក់ និង​បេឡារុស្ស ៣​នាក់​៕

អត្ថបទ៖ សុខមាន