ទូរទស្សន៍ Al Jazeera ដែលមានមូលដ្ឋាននៅប្រទេសកាតា បានរាយការណ៍ថា យ៉ាងហោចណាស់ជនជាតិប៉ាឡេស្ទីន ៩០នាក់ ត្រូវបានសម្លាប់ បន្ទាប់ពីការវាយប្រហាររបស់អ៊ីស្រាអែល លើតំបន់ហ្កាហ្សាស្ទ្រីបក្នុងរយៈពេលមួយថ្ងៃកន្លងទៅនេះ។

យោងតាមសារព័ត៌មាន Al Jazeera បានឲ្យដឹងថា មនុស្សរាប់រយនាក់ បានរងរបួស ប៉ុន្តែតួលេខចុងក្រោយមិនទាន់ត្រូវបានបញ្ជាក់នៅឡើយទេ។ ទូរទស្សន៍នេះ បានកត់សម្គាល់ឃើញថា ការវាយប្រហារតាមអាកាស និងកាំភ្លើងធំរបស់អ៊ីស្រាអែល បានកំណត់គោលដៅទៅលើអគារលំនៅឋាន ជំរំជនភៀសខ្លួនបណ្តោះអាសន្ន និងមន្ទីរពេទ្យ។

ក្រសួងសុខាភិបាលតំបន់ហ្កាហ្សា បានរាយការណ៍កាលពីថ្ងៃព្រហស្បតិ៍ថា ជនជាតិប៉ាឡេស្ទីនជិត ៤៥.៦០០នាក់ ត្រូវបានសម្លាប់ និងជាង ១០៨.៤០០នាក់ បានរងរបួស ចាប់តាំងពីភាពតានតឹង បានកើនឡើង នៅមជ្ឈិមបូព៌ា ក្នុងខែតុលា ឆ្នាំ ២០២៣។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ានៅថ្ងៃទី ៧ ខែតុលា ឆ្នាំ ២០២៣ នៅពេលដែលក្រុមយុទ្ធជនហាម៉ាស បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នកស្រុករស់នៅតាមព្រំដែនអ៊ីស្រាអែល និងចាប់ចំណាប់ថ្នូរជាង ២៥០នាក់ ក្នុងនោះមានស្ត្រី កុមារ និងមនុស្សចាស់។

ក្រុមហាម៉ាស បានពណ៌នាការវាយប្រហាររបស់ខ្លួនថា ជាការសងសឹកចំពោះសកម្មភាពឈ្លានពានដែលធ្វើឡើងដោយអាជ្ញាធរអ៊ីស្រាអែលប្រឆាំងនឹងវិហារឥស្លាម Al-Aqsa នៅលើប្រាសាទភ្នំ ក្នុងទីក្រុងចាស់របស់រទីក្រុងហ្ស៊េរុយសាឡឹម។