បើយោងតាមសេចក្តីរាយការណ៍ បានឲ្យដឹងថា លោក Joe Biden បានពិភាក្សាអំពីផែនការវាយប្រហារទីតាំងនុយក្លេអ៊ែររបស់អ៊ីរ៉ង់ នៅក្នុងករណីដែលទីក្រុងតេអេរ៉ង់ បានទៅកាន់កៀកនឹងការផលិតគ្រាប់បែកនុយក្លេអ៊ែរ មុនពេលលោក Donald Trump ឡើងកាន់តំណែងនៅថ្ងៃទី២០ ខែមករា។

មន្ត្រីអាមេរិក បានប្រាប់សារព័ត៌មាន Axios ថា ប្រធានាធិបតីសហរដ្ឋអាមេរិក ដែលនៅសល់ពេលវេលាតែប៉ុន្មានសប្តាហ៍ទៀត នៅក្នុងតំណែង ត្រូវបានបង្ហាញសេណារីយ៉ូជាច្រើន ដោយទីប្រឹក្សាសន្តិសុខជាតិរបស់សេតវិមាន លោក Jake Sullivan ក្នុងកិច្ចពិភាក្សាសម្ងាត់ដែលបានធ្វើឡើងកាលពីខែមុន។

ប្រភពមួយបានបង្ហើបថា គោលបំណងនៃកិច្ចប្រជុំនេះ មិនមែនដើម្បីឲ្យលោក Biden ឈានដល់ការសម្រេចចិត្តច្បាស់លាស់នោះឡើយ ប៉ុន្តែជាការចូលរួមក្នុង «ការរៀបចំសេណារីយ៉ូដោយប្រុងប្រយ័ត្ន»។ ការពិភាក្សានេះកើតឡើងបន្ទាប់ពីលោក Sullivan បាននិយាយកាលពីខែមុនថា លោកបានពន្យល់លោក Trump អំពី «ហានិភ័យ» ដែលទីក្រុងតេអេរ៉ង់ផលិតបានអាវុធនុយក្លេអ៊ែរ។

ជាមួយគ្នានេះ លោក Biden ត្រូវបានគេនិយាយថា បានចូលរួមក្នុងការពិភាក្សាអំពីរបៀបដែលសហរដ្ឋអាមេរិកគួរតែឆ្លើយតប ប្រសិនបើអ៊ីរ៉ង់ចាត់វិធានការជាក់លាក់ឆ្ពោះទៅរកការបង្កើតបានគ្រាប់បែកនុយក្លេអ៊ែរ មុនថ្ងៃទី២០ ខែមករា ក្នុងនោះរួមទាំងការចម្រាញ់សារធាតុអ៊ុយរ៉ានីញ៉ូមដល់ ៩០ភាគរយផងដែរ៕