រដ្ឋាភិបាលអាហ្សង់ទីន កាលពីថ្ងៃព្រហស្បតិ៍ (ទី២ ខែមករា) បានឲ្យដឹងថា ខ្លួនបានដាក់ពាក្យបណ្តឹងទៅតុលាការឧក្រិដ្ឋកម្មអន្តរជាតិ (ICC) ប្រឆាំងនឹងវេណេហ្ស៊ុយអេឡា ពាក់ព័ន្ធនឹងការឃុំខ្លួនសមាជិកនៃកងអាវុធហត្ថរបស់ខ្លួន ដែលជាសាខានៃកងកម្លាំងសន្តិសុខរបស់ប្រទេសអាហ្សង់ទីន ដោយហៅការធ្វើបែបនេះថា ជា «ការឃុំឃាំងដោយបង្ខំ។

តាមរយៈការបង្ហោះ នៅលើកម្មវិធីផ្ញើសារ Telegram រដ្ឋមន្ត្រីការបរទេសវេណេហ្ស៊ុយអេឡា លោក Yvan Gil បានច្រានចោលពាក្យបណ្ដឹងទៅកាន់ ICC នេះ ដោយហៅការប្ដឹងនេះថា ជា «ទិដ្ឋភាពដ៏គួរឲ្យអាណិត»។

គួរដឹងថា ភាពតានតឹង រវាងប្រទេសនៅតំបន់អាមេរិកខាងត្បូងទាំង២ បានកើនឡើង ចាប់តាំងពីលោក Javier Milei ដែលជាអ្នកសេរីនិយមស្តាំនិយមជ្រុល បានកាន់តំណែងជាប្រធានាធិបតីអាហ្សង់ទីន កាលពីចុងឆ្នាំ២០២៣។ ហើយទំនាក់ទំនង មានសភាពកាន់តែអាប់អួឡើងៗ បន្ទាប់ពីការបោះឆ្នោតប្រធានាធិបតីដ៏ចម្រូងចម្រាសរបស់ប្រទេសវេណេហ្ស៊ុយអេឡា កាលពីខែកក្កដាឆ្នាំមុន ដែលប្រធានាធិបតីសង្គមនិយម លោក Nicolas Maduro ដែលកំពុងកាន់អំណាច ទទួលបានជ័យជម្នះ។

កាលពីខែមុន អាហ្សង់ទីនបានចោទប្រកាន់ទីក្រុងការ៉ាកាសថា បានឃុំខ្លួន លោក Nahuel Gallo ដែលជាសមាជិកកងអាវុធហត្ថរបស់ខ្លួន បន្ទាប់ពីលោកបានព្យាយាមចូលប្រទេសវេណេហ្ស៊ុយអេឡាពីច្រកឆ្លងកាត់ប្រទេសកូឡុំប៊ី ដើម្បីទៅសួរសុខទុក្ខក្រុមគ្រួសារ។ ពួកគេបានទាមទារឲ្យមានការដោះលែងជាបន្ទាន់៕