ផ្សែងអ័ព្ទដ៏ក្រាស់ឈ្មឹក បានគ្របដណ្ដប់លើរដ្ឋធានីរបស់ប្រទេសឥណ្ឌា នៅថ្ងៃសុក្រ (ទី៣ ខែមករា) នេះ ដោយជំរុញឲ្យមានការព្រមាន អំពីការរំខានដល់ការហោះហើរពីមន្ត្រីអាកាសយានដ្ឋាន និងក្រុមហ៊ុនអាកាសចរណ៍ ខណៈដែលគុណភាពខ្យល់បរិយកាសដែលកាន់តែអាក្រក់ឡើងៗ ធ្វើឲ្យលែងមើលឃើញអ្វីសោះតែម្ដង នៅក្នុងតំបន់មួយចំនួន។

ទីក្រុងញូវដេលី (New Delhi) ដែលបាន និងកំពុងប្រយុទ្ធជាមួយផ្សែងអ័ព្ទ និងគុណភាពខ្យល់មិនល្អ ចាប់តាំងពីដើមរដូវរងាមកនោះ ជាប់ចំណាត់ថ្នាក់ទី៣ ក្នុងចំណោមរដ្ឋធានីដែលមានការបំពុលខ្លាំងបំផុតរបស់ពិភពលោក នៅក្នុងចំណាត់ថ្នាក់តាមពេលវេលាជាក់ស្ដែងរបស់ក្រុមហ៊ុនវាយតម្លៃគុណខ្យល់ IQAi របស់ប្រទេសស្វីស នៅថ្ងៃសុក្រនេះ។

អ្នកនាំពាក្យអាកាសយានដ្ឋាន បានប្រាប់ថា មិនទាន់មានការបង្វែរ ឬលុបចោលជើងហោះហើរណាមួយនៅឡើយទេ ទោះបីជាអាជ្ញាធរបានព្រមាននៅលើបណ្ដាញសង្គម X ថា យន្តហោះ ដែលខ្វះឧបករណ៍ ដើម្បីឲ្យការចុះចតប្រកបដោយសុវត្ថិភាព នៅពេលពិបាកមើលផ្លូវ អាចប្រឈមនឹងការលំបាកក៏ដោយ។

នៅលើបណ្ដាញសង្គមរបស់ខ្លួន ក្រុមហ៊ុនអាកាសចរណ៍ធំបំផុតរបស់ឥណ្ឌា IndiGo និងក្រុមហ៊ុនអាកាសចរណ៍តម្លៃទាប Spicejet ក៏បានព្រមានពីការពន្យារពេល ដោយសារអាកាសធាតុផងដែរ។ គេហទំព័រអាកាសចរណ៍ FlightRadar24 បានឲ្យដឹងថា ការពន្យារពេលជាមធ្យម ៨នាទី សម្រាប់ជើងហោះហើរចំនួន ២០វ៉ុល នៅម៉ោង ១០:១៤នាទីព្រឹក (ម៉ោងក្នុងស្រុក)។ ប្រព័ន្ធផ្សព្វផ្សាយបានរាយការណ៍ថា សេវារថភ្លើងមួយចំនួននៅក្នុងរដ្ឋធានីក៏ត្រូវបានពន្យារពេលផងដែរ។

ស្ថាប័នគ្រប់គ្រងការបំពុលបរិស្ថានជាន់ខ្ពស់របស់ប្រទេស បានប្រាប់ថា គុណភាពខ្យល់របស់ទីក្រុងញូវដេលី ត្រូវបានវាយតម្លៃថា «អន់ណាស់» នៅថ្ងៃសុក្រនេះ ដោយពិន្ទុសន្ទស្សន៍ ៣៥១ ជាចំនួនលើសឆ្ងាយពីកម្រិតពីសូន្យដល់ ៥០ ដែលត្រូវបានចាត់ទុកថា ជាកម្រិតខ្យល់បរិយាកាស «ល្អ»៕