​បាល់ទាត់៖ ​ក្រុម​ហូ​ឡង់ Ajax Amsterdam បាន​បន្ត​ស្ថិតិ​ឈ្នះ ១០០% ក្រោយ​វាយបក​ពីក្រោយ​យកឈ្នះ​នៅ​ទឹកដី​អាល្លឺម៉ង់ Dortmund ៣-១​។ ​ក្រុម​ម្ចាស់ផ្ទះ​បាត់បង់​កីឡាករ​ម្នាក់​នៅ​នាទី​ទី២៩ នៅពេល​ខ្សែការពារ​អាល្លឺម៉ង់ Mats Hummels ទទួលបាន​កាត​ក្រហម​បណ្តេញ​ចេញពី​ការប្រកួត​។

​​តែ​គ្នា​តិចជាង​មែន Dortmund ក៏​រកបាន​គ្រាប់​នាំមុខ​ដោយ​បាល់ ១១ម៉ែត្រ​របស់ Marco Reus ក្រោយ​កំហុស​របស់​ខ្សែការពារ Ajax លើ Juse Bellingham​។​ ​តែ​ចូល​វគ្គ​ទី២ ស្ថានភាព​កែប្រែ​ទាំង​ស្រុង​នៅពេល Ajax វាយបក ៣​គ្រាប់​វិញ​ដោយ Dusan Tadic នាទី​ទី៧២ អតីត​ខ្សែប្រយុទ្ធ West Ham, Sebastian Haller នាទី​ទី៨៣ និង Davy Klaassen នាទី​ទី៩០+៣​។ ​​បី​ពិន្ទុ​នេះ​ធ្វើឱ្យ​ក្រុម​របស់លោក Erik Ten Hag កក់​កៅអី​នៅ​វគ្គ ១៦ក្រុម​ចុងក្រោយ​មាន ១២ពិន្ទុ​ពេញ​ពី​ការប្រកួត​ ៤​លើក ​ខណៈ Dortmund ឈរ​លេខ២ មាន ៦ពិន្ទុ​ស្មើគ្នា​ជាមួយ​ក្រុម​លេខ៣ Sporting Lisbon​។​

​​ក្រុម​ជើងឯក​ព័រទុយហ្កាល់ Sporting Lisbon បាន​បំបាក់​ក្រុម​ភ្ញៀវ​ទួ​រ​គី Besiktas ៤-០ ដោយ​គ្រាប់​បាល់​របស់ Pedro Goncalves ២គ្រាប់​ម្នាក់ឯង, Paulinho ១គ្រាប់ និង Pablo Sarabia ១គ្រាប់​។​ ​Besiktas បន្ត​គ្មាន​ពិន្ទុ​រាប់​ដដែល​ក្នុង​ពូ​ល C នេះ​ក្រោយ​ចាញ់​ទាំង ៤ប្រកួត​៕

​អត្ថបទ​៖​នាង សុភា​វុ​ធ