ប្រតិបត្តិករបណ្តាញថាមពលជាតិរបស់ប្រទេសហ្វាំងឡង់ កាលពីថ្ងៃព្រហស្បតិ៍ (ទី២ ខែមករា) បានប្រាប់ឲ្យដឹងថា ខ្លួនបានស្នើសុំតុលាការទីក្រុងហែលស៊ិនគី (Helsinki) ឲ្យរឹបអូសនាវាដឹកប្រេង Eagle S ក្នុងគោលបំណងធានាដល់ការទាមទាររបស់ក្រុមហ៊ុន ពាក់ព័ន្ធនឹងការខូចខាតដែលទាក់ទងនឹងការដាច់បណ្តាញតភ្ជាប់អគ្គិសនី Estlink 2 នៅក្រោមសមុទ្រ។

គួររំលឹកថា ខ្សែកាបតភ្ជាប់ រវាងប្រទេសហ្វាំងឡង់ និងអេស្តូនី បានរងការខូចខាត កាលពីថ្ងៃទី២៥ ខែធ្នូ រួមជាមួយបណ្តាញទូរគមនាគមន៍ចំនួន ៤ខ្សែផ្សេងទៀត ហើយនៅថ្ងៃបន្ទាប់អាជ្ញាធរហ្វាំងឡង់ បានឡើងលើនាវាដឹកប្រេងរបស់រុស្ស៊ី ដោយមានការសង្ស័យថា នាវានេះបានបណ្តាលឲ្យខូចខាតនេះ ដោយការអូសយុថ្កាតាមបាតសមុទ្រ។

បណ្តាប្រទេសនៅសមុទ្របាល់ទិក កំពុងមានការប្រុងប្រយ័ត្នខ្ពស់ បន្ទាប់ពីមានការដាច់ខ្សែកាបថាមពល បណ្តាញទូរគមនាគមន៍ និងបំពង់បង្ហូរហ្គាស ឬប្រេង ចាប់តាំងពីរុស្ស៊ីបានលុកលុយអ៊ុយក្រែន ក្នុងឆ្នាំ២០២២។ ហើយអង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) កាលពីសប្តាហ៍មុន បានលើកឡើងថា ខ្លួននឹងជំរុញវត្តមានរបស់ខ្លួន នៅក្នុងតំបន់នេះ។

ក្រុមហ៊ុនប្រតិបត្តិករ Fingrid បានឲ្យដឹងនៅក្នុងសេចក្តីថ្លែងការណ៍កាលពីថ្ងៃព្រហស្បតិ៍ថា ខ្លួនបានស្នើសុំឲ្យតុលាការប្រចាំតំបន់ ក្នុងទីក្រុងហែលស៊ិនគី រឹបអូសនាវា Eagle S ជាផ្លូវការ ដើម្បីជួយធានាដល់ការទាមទារផ្នែកហិរញ្ញវត្ថុរបស់ខ្លួន។

Fingrid បានប្រាប់ថា៖ «ការស៊ើបអង្កេតបន្ថែមទៀតនៅកន្លែងខូចខាត ត្រូវបានរំពឹងថា នឹងផ្តល់ព័ត៌មានបន្ថែម អំពីទំហំនៃការខូចខាត និងអាចឲ្យមានផែនការលម្អិតបន្ថែមទៀត និងកាលវិភាគនៃការជួសជុល»។ 

ក្រុមហ៊ុននេះបានប្រាប់កាលពីសប្តាហ៍មុនថា ខ្លួនរំពឹងថា ខ្សែបណ្ដាញនេះនឹងអាចដំណើរការឡើងវិញ ក្នុងខែសីហាឆ្នាំនេះ៕