ជនប៉ាឡេស្ទីន បានប្រមូលផ្តុំគ្នានៅផ្ទះបាយសប្បុរសធម៌ ស្ថិតក្នុងទីក្រុង Khan Younis តំបន់ហ្កាហ្សា ដើម្បីប្រញាយគ្នាដណ្តើមអាហារឆ្អិន ។

 ក្មេងតូចៗ ត្រូវបានគេមើលឃើញស្ថិតនៅក្នុងចំណោមហ្វូងមនុស្ស ក្នុងនោះពួកគេមួយចំនួន ខំប្រឹងលើកឆ្នាំងទទួលយកអាហារក្តៅ ។

 អ្នកស្រី Fawwaz Saleh ដែលមានកូន ១០នាក់ត្រូវចិញ្ចឹមនោះ និយាយថា ពេលមានផ្ទះបាយសប្បុរសធម៌ ក្មេងៗបានទទួលទាន ហើយពេលដែលគ្មានផ្ទះបាយសប្បុរសធម៌ គ្មានចំណីអាហារនោះទេ ពួកយើងទៅដេកទាំងការស្រេកឃ្លាន ។

ក្រុមអាជ្ញាធរអ៊ីស្រាអែល និយាយថា ពួកគេអនុញ្ញាតឲ្យរយន្តដឹកជំនួយរាប់ពាន់គ្រឿងដឹកចំណីអាហារ ទឹក គ្រឿងវេជ្ជសាស្រ្ត និងការផ្គត់ផ្គង់ទីជម្រកចូលទៅក្នុងតំបន់ហ្កាហ្សា ។

ទោះបីជាយ៉ាងណាក៏ដោយ ទីភ្នាក់ងារជំនួយអន្តរជាតិ និយាយថា កងកម្លាំងអ៊ីស្រាអែល កំពុងរារាំងការចែកចាយជំនួយ ធ្វើឲ្យវិបត្តិមនុស្សធម៌កាន់តែអាក្រក់ខ្លាំងឡើងនៅតំបន់ហ្កាហ្សា ។

សង្រ្គាមនៅហ្កាហ្សា បានចាប់ផ្តើមកាលពីខែតុលា ឆ្នាំ ២០២៣ ពេលក្រុមហាម៉ាស់វាយប្រហារដ៏គួរភ្ញាក់ផ្អើលលើអ៊ីស្រាអែល ដែលបានសម្លាប់មនុស្ស ១.២០០នាក់ ។

យោងតាមការអះអាងរបស់ក្រុមអាជ្ញាធរសុខភាពប៉ាឡេស្ទីន បានឲ្យដឹងថា យុទ្ធនាការយោធាកំពុងបន្តរបស់អ៊ីស្រាអែល បានធ្វើឲ្យមនុស្ស ១,៩លាននាក់ ស្មើនឹងប្រហែល ៩០ភាគរយនៃពលរដ្ឋសរុបនៅតំបន់ហ្កាហ្សា ត្រូវបានជម្លៀសខ្លួន ហើយជនប៉ាឡេស្ទីនប្រហែល ៤៥.០០០ត្រូវបានសម្លាប់ ៕