មន្ត្រីជាន់ខ្ពស់មួយរូប បាននិយាយថា ប្រទេសប៉ូឡូញបានសម្រេចមិនអញ្ជើញឯកអគ្គរដ្ឋទូតហុងគ្រីទៅចូលរួមព្រឹត្តិការណ៍ នៅថ្ងៃសុក្រ (ទី៣ ខែមករា) នេះ ដែលជាការចាប់ផ្តើមនៃការកាន់តំណែងជាប្រធានសហភាពអឺរ៉ុប (EU) នៅទីក្រុងវ៉ាសូវី បន្ទាប់ពីទីក្រុងប៊ុយដាប៉េសបានផ្តល់សិទ្ធិជ្រកកោនដល់អតីតអនុរដ្ឋមន្ត្រីដែលកំពុងស្ថិតក្រោមការស៊ើបអង្កេត ពាក់ព័ន្ធទៅនឹងការចោទប្រកាន់ពីបទប្រើប្រាស់មូលនិធិសាធារណៈមិនត្រឹមត្រូវ។

ហើយអនុរដ្ឋមន្ត្រីទទួលបន្ទុកកិច្ចការអឺរ៉ុប លោកស្រី Magdalena Sobkowiak-Czarnecka បាននិយាយថា នាយករដ្ឋមន្ត្រីហុងគ្រី លោក Viktor Orban ក៏មិនត្រូវបានអញ្ជើញឲ្យចូលរួមក្នុងពិធី នៅឯសាលមហោស្រព Grand Theatre របស់ទីក្រុងវ៉ាសូវីនេះដែរ ។

គួរដឹងថា ទីក្រុងវ៉ាសូវី បានប្រតិកម្មយ៉ាងខឹងសម្បា នៅពេលដែលហុងគ្រីបានផ្តល់សិទ្ធិជ្រកកោននយោបាយ កាលពីខែមុន ដល់លោក Marcin Romanowski អតីតអនុរដ្ឋមន្ត្រីក្រសួងយុត្តិធម៌ប៉ូឡូញដែលត្រូវបានឃុំខ្លួន កាលពីខែកក្កដាឆ្នាំមុន ជាផ្នែកនៃការស៊ើបអង្កេតលើការប្រើប្រាស់មូលនិធិសាធារណៈមិនត្រឹមត្រូវ។ 

លោក Romanowski ត្រូវបានដោះលែងភ្លាមៗ បន្ទាប់ពីប្រធានសភាសិទ្ធិមនុស្សអឺរ៉ុប បានប្រាប់ថា លោកមានអភ័យឯកសិទ្ធិជាសមាជិកនៃស្ថាប័ននេះ។ អតីតរដ្ឋមន្ត្រីរូបនេះបដិសេធការចោទប្រកាន់លើរូបលោក។

នាយករដ្ឋមន្ត្រីប៉ូឡូញ លោក Donald Tusk និងប្រមុខក្រុមប្រឹក្សាអឺរ៉ុប លោក Antonio Costa គ្រោងនឹងថ្លែងសុន្ទរកថានៅក្នុងពិធីស្បថចូលកាន់តំណែងប្រធាន EU របស់ប៉ូឡូញ ដែលរដ្ឋសមាជិកនីមួយៗនៃប្លុកនេះ កាន់តំណែងប្ដូរវេនរយៈពេល ៦ខែ។ ហុងគ្រីបានកាន់តំណែងប្រធាននេះ អំឡុងឆមាសទី២ ឆ្នាំ២០២៤៕