មេដឹកនាំបក្ស Neos នៅថ្ងៃសុក្រ (ទី៣ ខែមករា) នេះ បាននិយាយថា ក្រុមដ៏តូចបំផុតរបស់ខ្លួន ដែលស្ថិតក្នុងចំណោមគណបក្សកណ្តាលនិយមចំនួន ៣ នៅក្នុងកិច្ចចរចាបង្កើតរដ្ឋាភិបាលចម្រុះរបស់ប្រទេសអូទ្រីស កំពុងចាកចេញពីកិច្ចពិភាក្សានេះ ដោយបានបង្កើតឲ្យមានភាពច្របូកច្របល់ដល់ការចរចាដែលមិនរាប់បញ្ចូលគណបក្សស្តាំនិយមជ្រុល គឺបក្សសេរីភាព (FPO)។

ចំណាត់ការនេះ បានធ្វើឲ្យកិច្ចពិភាក្សាស្ថិតក្នុងភាពមិនច្បាស់លាស់កាន់តែខ្លាំងឡើងៗ ដោយគណបក្ស ដែលរិះគន់អឺរ៉ុប និងដែលមានសមានចិត្តជាមួយរុស្ស៊ី គឺបក្ស FPO ដែលបានឈ្នះលំដាប់ទី១ នៅក្នុងការបោះឆ្នោតសភា កាលពីខែកញ្ញា ប៉ុន្តែមិនត្រូវបានប្រគល់ភារកិច្ចឲ្យបង្កើតរដ្ឋាភិបាល ដោយបានត្រឹមតែរង់ចាំឱកាសប៉ុណ្ណោះ។

ការស្ទង់មតិបង្ហាញថា ការគាំទ្រ ចំពោះគណបក្ស FPO មានតែកើនឡើង ចាប់តាំងពីទទួលបានសំឡេងឆ្នោត ២៩ភាគរយ នៅក្នុងការបោះឆ្នោត កាលពីថ្ងៃទី២៩ ខែកញ្ញា។ គណបក្សនេះបានថ្កោលទោសការចរចានេះថា មិនមានប្រជាធិបតេយ្យ ព្រោះជាការស្វែងរកការបង្កើត «រដ្ឋាភិបាលចម្រុះដោយក្រុមអ្នកចាញ់»។

ពាក់ព័ន្ធនឹងការដកខ្លួននេះ មេដឹកនាំបក្ស Neos លោកស្រី Beate Meinl-Reisinger បានប្រាប់សន្និសីទសារព័ត៌មានដែលបានរៀបចំឡើងយ៉ាងប្រញាប់ប្រញាល់ថា កិច្ចពិភាក្សាជាមួយគណបក្សអភិរក្សនិយម People's Party (OVP) របស់អធិការបតី លោក Karl Nehammer និងគណបក្សសង្គមប្រជាធិបតេយ្យ (SPO) ខ្វះមហិច្ឆិតា និងមិនបានធ្វើឲ្យមានវឌ្ឍនភាពគ្រប់គ្រាន់៕