នៅថ្ងៃសុក្រនេះ ជនប៉ាឡេស្ទីន បានពិនិត្យមើលការខូចខាតនៅជំរំជនភៀសខ្លួន Maghazi ស្ថិតក្នុងតំបន់ហ្កាហ្សា រយៈពេល ១ថ្ងៃ ក្រោយការវាយប្រហាររបស់អ៊ីស្រាអែលសម្លាប់មនុស្សជាច្រើននាក់ ។

នៅមន្ទីរពេទ្យ Al-Aqsa Martyrs ស្ថិតក្នុងទីក្រុង Deir Al-Balah ជនប៉ាឡេស្ទីន បានជួបជុំគ្នានៅជុំវិញសាកសពអ្នកដែលត្រូវបានសម្លាប់ដោយសារការវាយប្រហាររបស់អ៊ីស្រាអែលនៅតំបន់ផ្សេង រួមទាំងអ្នកសារព័ត៌មាន Omar Al-Derawi ។

លោក Abou Mohamad Al Haddad គឺជាជនប៉ាឡេស្ទីនមួយរូបនិយាយថា លោករស់នៅក្នុងសង្កាត់នេះ ដែលបានក្លាយជាគោលដៅវាយប្រហារកាលពីយប់ម្សិលមិញ នៅចន្លោះម៉ោង ១០ និងម៉ោង ១០ ១៥នាទី ដោយគ្មានការព្រមានទុកជាមុននោះទេ ពេលដែលគ្រាប់បែកដ៏ធំមួយបានបំផ្លាញផ្ទះជាច្រើនខ្នង ។

លោកបន្តថា នៅកណ្តាលគំនរអគារបាក់បែកនេះ នៅកណ្តាលសោកនាដកម្មនេះដែលពួកយើងកំពុងរស់នៅ នៅកណ្តាលការឈឺចាប់នេះ និងរបួសចេញឈាមនេះ ពួកយើងសង្ឃឹមថា ពិភពសេរី ពិភពអារ៉ាប់ និងពិភពអ៊ិស្លាម នឹងមើលឃើញជនប៉ាឡេស្ទីន និងធ្វើការដើម្បីទទួលបានបទឈប់បាញ់ បញ្ឈប់ការបង្ហូរឈាមមួយនេះ សូមមេត្តាអាណិតអាសូរដល់មនុស្សរងផលប៉ះពាល់ទាំងអស់នេះផង ៕