ជាមួយនឹងដំណើរទស្សនកិច្ចរបស់រដ្ឋមន្ត្រីការបរទេសអាល្លឺម៉ង់ និងបារាំងទៅកាន់ទីក្រុងដាម៉ាស សហភាពអឺរ៉ុប (EU) បាន និងកំពុងបង្កើនកិច្ចខិតខំប្រឹងប្រែង ក្នុងការបង្កើតទំនាក់ទំនងជាមួយមេដឹកនាំថ្មីរបស់ប្រទេសស៊ីរី និងបញ្ចុះបញ្ចូលពួកគេ ដើម្បីកាត់បន្ថយឥទ្ធិពលរបស់រុស្ស៊ីលើប្រទេសដែលរងការបំផ្លិចបំផ្លាញដោយសង្រ្គាមមួយនេះ។

លោកស្រី Annalena Baerbock របស់អាល្លឺម៉ង់ និងសមភាគីបារាំងរបស់លោកស្រី គឺលោក Jean-Noël Barrot កំពុងជួបពិភាក្សាជាមួយមេដឹកនាំជាកស្ដែងរបស់ប្រទេសស៊ីរី គឺលោក Ahmed al-Sharaa នៅថ្ងៃសុក្រ (ទី៣ ខែមករា) នេះ។ អ្នកទាំង២ គឺជាមន្ត្រីលោកខាងលិចមានឋានៈខ្ពស់បំផុតដែលធ្វើដំណើរទៅប្រទេសស៊ីរី គិតចាប់តាំងពីក្រុមឥស្លាមនិយមរបស់លោក al-Sharaa គឺក្រុម Hayat Tahrir Al-Sham (HTS) បានទម្លាក់ប្រធានាធិបតីស៊ីរី លោក Bashar al-Assad ពីអំណាច ក្នុងខែធ្នូ ឆ្នាំ២០២៤។

លោកស្រី Baerbock បាននិយាយថា EU ចង់ជួយស៊ីរីឲ្យសម្រេចបាននូវ «ការផ្ទេរអំណាចប្រកបដោយសន្តិវិធី និងបរិយាបន្ន» ហើយនិងជាមួយកិច្ចខិតខំប្រឹងប្រែងកសាងឡើងវិញ។ លោកស្រីបានទទួលស្គាល់ថា ការងារនោះនឹងក្លាយជាការធ្វើដំណើរលើ «ផ្លូវដ៏លំបាកមួយ»។

គួរបញ្ជាក់ថា ក្រុម HTS មិនទាន់បានគ្រប់គ្រងដែនដីស៊ីរីទាំងអស់នៅឡើយទេ ហើយវាប្រហែលជាមានរយៈពេលច្រើនឆ្នាំទៀត មុនពេលដែលប្រទេសនេះមានស្ថិរភាពគ្រប់គ្រាន់ ដើម្បីអាចរៀបចំការបោះឆ្នោត។ ជាងនេះទៅទៀត ប្រជាជនស៊ីរី និងប្រទេសលោកខាងលិចជាច្រើន នៅតែមានការប្រុងប្រយ័ត្ន ចំពោះក្រុម HTS ដែលធ្លាប់មានទំនាក់ទំនងជាមួយក្រុមអាល់កៃដា រហូតដល់ឆ្នាំ២០១៦៕