ប៉ាណាម៉ា និយាយថា ពួកគេបានមើលឃើញចំនួនធ្លាក់ចុះរបស់ជនអន្តោប្រវេសន៍ដែលធ្វើដំណើរឆ្លងកាត់ផ្លូវគ្រោះថ្នាក់ Darien Gap អំឡុងឆ្នាំ ២០២៤ ។

 ផ្លូវនេះ តភ្ជាប់អាមេរិកខាងត្បូង និងអាមេរិកកណ្តាល ហើយមនុស្សដែលឆ្លងកាត់ទីនេះ ភាគច្រើនធ្វើដំណើរឆ្ពោះទៅកាន់សហរដ្ឋអាមេរិក ។

 ប្រធានាធិបតីថ្មីប៉ាណាម៉ា បាននិយាយថា ជនអន្តោប្រវេសន៍ប្រហែល ៣០ម៉ឺននាក់ បានឆ្លងកាត់ផ្លូវនេះ កាលពីឆ្នាំមុន ពោលគឺធ្លាក់ពីចំនួនប្រហែលកន្លះលាននាក់ កាលពីរយៈពេល ១ឆ្នាំមុន ដែលជាចំនួនជាប់កំណត់ត្រា ។

 លោកប្រធានាធិបតី Jose Raul Mulino បានប្រកាន់គោលជំហរម៉ឺងម៉ាត់លើការធ្វើអន្តោប្រវេសន៍ ចាប់តាំងពីឡើងកាន់តំណែងកាលពីខែកក្កដា ឆ្នាំមុន ។ លោកបានចុះយុទ្ធនាការ ដើម្បីបញ្ចប់ស្ថានការរបស់ប៉ាណាម៉ាថាជាចំណុចឆ្លងកាត់របស់ជនអន្តោប្រវេសន៍ ។

 លោកនិយាយថា ផ្លូវអន្តោប្រវេសន៍ Darien ដែលធ្លាប់ប្រើប្រាស់ដោយជនអន្តោប្រវេសន៍ជាច្រើន ត្រូវបានគ្រប់គ្រងនៅថ្ងៃនេះ ពួកយើងធ្វើការពីមួយថ្ងៃទៅមួយថ្ងៃ ដើម្បីឲ្យការធ្វើអន្តោប្រវេសន៍ខុសច្បាប់លែងអាចទៅដល់ទីក្រុងប៉ាណាម៉ាបានទៀតហើយ ឬតំបន់ផ្សេងទៀតរបស់ប្រទេសមួយនេះ ។

 គួរឲ្យដឹងថា នៅតាមផ្លូវ Darien Gap គេមើលឃើញមនុស្សធ្វើដំណើរដោយថ្មើរជើងរយៈពេលជាច្រើនថ្ងៃ ហើយពួកគេប្រឈមនឹងករណីចោរប្លន់ អំពើហិង្សា ការជួញដូរមនុស្សខុសច្បាប់ និងការបំពានផ្លូវភេទ ។

 ផ្លូវមួយនេះគឺជាគំលាតមួយនៃផ្លូវហាយវ៉េប៉ាណាម៉ា-អាមេរិក ដោយមានព្រៃស្តុកយ៉ាងក្រាស់ឃ្មឹក និងមានហេដ្ឋារចនាសម្ព័ន្ធតិចតួចប៉ុណ្ណោះ ។

 ភាគច្រើននៃជអន្តោប្រវេសន៍ដែលឆ្លងកាត់ផ្លូវនេះ មកពីប្រទេសវេណេស៊ុយអេឡា ក្រោយពួកគេគេចចេញពីវិបត្តិសេដ្ឋកិច្ច ។

 ទោះបីជាយ៉ាងណាក៏ដោយ ជអន្តោប្រវេសន៍មួយចំនួនទៀត មកពីប្រទេសជាច្រើនផ្សេងទៀត រួមទាំងប្រទេសចិន និងឥណ្ឌាផងដែរ ៕