អាកាសយានដ្ឋានប្រទេសអាល្លឺម៉ង់ ទទួលរងការដាច់ប្រព័ន្ធព័ត៌មានវិទ្យានៅទូទាំងប្រទេស ដែលធ្វើឲ្យប៉ះពាល់ដល់ប្រព័ន្ធរបស់នគរបាលនៅកន្លែងត្រួតពិនិត្យព្រំដែន កាលពីថ្ងៃសុក្រ ទី៣ ខែមករា បណ្តាលឱ្យមានការរំខាន និងមានជួរអ្នកដំណើរដ៏វែងមកពីខាងក្រៅតំបន់ធ្វើដំណើរ ស៊ែងិន(Schengen) របស់សហភាពអឺរ៉ុប។

អ្នកនាំពាក្យនគរបាលសហព័ន្ធ បាននិយាយតាមទូរស័ព្ទថា «បច្ចុប្បន្ននេះ មានការរំខានផ្នែកព័ត៌មានវិទ្យានៅទូទាំងប្រទេស» ដោយបង្ខំឱ្យមន្រ្តីធ្វើការដោយដៃក្នុងដំណើរការសម្រាប់អ្នកដំណើរដែលមកដល់ពីខាងក្រៅតំបន់ស៊ែងិន(Schengen) ដែលគ្មានលិខិតឆ្លងដែន។

មូលហេតុ ពុំទាន់ត្រូវបានគេដឹងភ្លាមៗនៅឡើយទេ។ ការដាច់ប្រព័ន្ធនេះ បានបណ្តាលឱ្យមានការតម្រង់ជួរដ៏វែង ដែលមនុស្សជាច្រើនត្រូវរង់ចាំនៅកន្លែងត្រួតពិនិត្យព្រំដែននៅអាកាសយានដ្ឋានប្រទេសអាល្លឺម៉ង់ រួមទាំងនៅទីក្រុង Frankfurt ជាទីក្រុងមមាញឹកបំផុតរបស់ប្រទេស។

អាកាសយានដ្ឋានទីក្រុងប៊ែកឡាំង បានបញ្ជាក់ពីពេលវេលារង់ចាំយូរ នៅឯការិយាល័យអន្តោប្រវេសន៍សម្រាប់អ្នកដំណើរដែលពុំមែនតំបន់ស៊ែងិន(Schengen) ។

អ្នកនាំពាក្យអាកាសយានដ្ឋាន Duesseldorf បាននិយាយថា «យើងអាចបញ្ជាក់បានថា ចាប់តាំងពីម៉ោងប្រហែល២:០០រសៀល មានការរំខានជាច្រើនដល់ការត្រួតពិនិត្យព្រំដែនសម្រាប់ជើងហោះហើរទៅ និងមក ពីតំបន់ពុំមែនស៊ែងិន(Schengen) ដោយនិយាយថា អ្នកដំណើរកំពុងត្រូវបានផ្តល់ទឹកទទួលទាន។

ទូរទស្សន៍រដ្ឋក្នុងតំបន់ WDR បានរាយការណ៍ថា អ្នកដំណើរបានរង់ចាំរយៈពេលពីរម៉ោងនៅឯការិយាល័យអន្តោប្រវេសន៍ ខណៈអ្នកផ្សេងទៀត នៅលើយន្តហោះ។