ប្រទេសប៉ូឡូញ បានចាប់ផ្តើមតំណែងរបស់ខ្លួនជាប្រធានក្រុមប្រឹក្សាសហភាពអឺរ៉ុប កាលពីថ្ងៃសុក្រ ទី ៣ ខែមករា ដោយសង្កត់ធ្ងន់លើបញ្ហាសន្តិសុខ ខណៈដែលប្លុកនេះប្រឈមនឹងការវិលត្រឡប់របស់លោក Donald Trump ទៅកាន់សេតវិមាន ដែលនឹងធ្វើឱ្យទំនាក់ទំនងពាណិជ្ជកម្មកាន់តែយ៉ាប់យ៉ឺនជាមួយប្រទេសចិននិងរុស្ស៊ី ក្នុងសង្គ្រាមនៅប្រទេសអ៊ុយក្រែន។

ប្រធានក្រុមប្រឹក្សាអឺរ៉ុប លោក Antonio Costa បានសង្កត់ធ្ងន់លើសារៈសំខាន់នៃការបន្តគាំទ្រដល់ទីក្រុងគីវ រហូតដល់មាន «សន្តិភាពទូលំទូលាយ យុត្តិធម៌ និងយូរអង្វែង» ដែលត្រូវបានឈានដល់ និងបាននិយាយថា វិស័យការពារជាតិ គឺជាអាទិភាពជាយុទ្ធសាស្ត្រសម្រាប់សហភាពអឺរ៉ុប។

ប្រទេសប៉ូឡូញ កំពុងស្វែងរកតួនាទីឈានមុខ ក្នុងការរៀបចំគោលនយោបាយសហភាពអឺរ៉ុប ជាពិសេសលើបញ្ហាសន្តិសុខ ហើយនាយករដ្ឋមន្ត្រី លោក Donald Tusk គឺជាឥស្សរជនដែលមានទំនាក់ទំនងល្អ នៅលើឆាកសហភាពអឺរ៉ុប។

ប៉ុន្តែ ខណៈរដ្ឋធានីនានារបស់អឺរ៉ុប ប្រឈមនឹងការសម្រេចចិត្តដ៏តានតឹង លើបញ្ហាដូចជា របៀបដើម្បីជំរុញ និងផ្តល់ហិរញ្ញវត្ថុដល់ការចំណាយលើវិស័យការពារជាតិ ក្រុមអ្នកវិភាគនិយាយថាទីក្រុង វ៉ាសាវី មិនទំនងជា អាចដឹកនាំដោយខ្លួនឯងបានទេ។

ទាក់ទងនឹងបញ្ហាសន្តិសុខរួមរបស់ហភាពរបស់អឺរ៉ុប និងការគាំទ្រសម្រាប់ទីក្រុងគីវ អ្នកវិភាគមួយចំនួនបាននិយាយថា ប្រទេសអាល្លឺម៉ង់ ដែលជាប្រទេសមានសេដ្ឋកិច្ចធំបំផុតរបស់អឺរ៉ុប អាចដើរតួនាទីធំជាងនេះ បន្ទាប់ពីការបោះឆ្នោតជាតិនៅថ្ងៃទី២៣ ខែកុម្ភៈ ដែលក្រុមអភិរក្សនិយម ត្រូវបានគេរំពឹងថានឹងទទួលជ័យជម្នះ។