ទីក្រុងនានារបស់សហរដ្ឋអាមេរិក កំពុងចាប់ផ្តើមឆ្នាំថ្មីដោយមានការប្រុងប្រយ័ត្នខ្ពស់ បន្ទាប់ពីការវាយប្រហារដោយបើករថយន្តបំបុកមនុស្សនៅទីក្រុង នូ អលីន(New Orleans) និងការផ្ទុះនៅខាងក្រៅសណ្ឋាគារ Trump ក្នុងទីក្រុង Las Vegas។ ឧប្បត្តិហេតុទាំងពីរនេះ បានបង្កើនការព្រួយបារម្ភនៃការគំរាមកំហែងកាន់តែច្រើន ក្នុងរយៈពេលមួយខែ ដែលពេញទៅដោយព្រឹត្តិការណ៍នៅទីសាធារណៈទ្រង់ទ្រាយធំ។

នៅទីក្រុងវ៉ាស៊ីនតោន នគរបាលបាននិយាយថា ពួកគេបានបង្កើនសន្តិសុខនៅទូទាំងទីក្រុង។

ចំណាត់ការនេះ ធ្វើឡើង មុនពិធីបុណ្យសពផ្លូវរដ្ឋសម្រាប់អតីតប្រធានាធិបតី លោក Jimmy Carter នៅថ្ងៃទី៩ ខែមករា ព្រមទាំងពិធីឡើងកាន់តំណែងរបស់ប្រធានាធិបតីជាប់ឆ្នោត លោក Donald Trump នៅថ្ងៃទី២០ ខែមករា។

កាលពីថ្ងៃព្រហស្បតិ៍ ព្រឹត្តិការណ៍ Sugar Bowl ប្រចាំឆ្នាំក្រុមបាល់ទាត់របស់មហាវិទ្យាល័យនៅទីក្រុង New Orleans ត្រូវបានពន្យារពេលមួយថ្ងៃ ដោយសារតែការវាយប្រហារ ដែលនេះក៏បានឃើញសន្តិសុខ ត្រូវបានររឹតបន្តឹងផងដែរ។

មុនពេលការប្រកួត សន្តិសុខ ត្រូវបានដាក់បន្ថែមដោយមានរបាំងការពារ ហើយពុកីឡដ្ឋាន ត្រូវបានដាក់ពង្រាយដោយសត្វសុនខហិតក្លិនគ្រាប់បែក និងគ្រឿងផ្ទុះ។

នៅទីក្រុងញូវយ៉ក មានការពង្រឹងសន្តិសុខនៅខាងក្រៅអគារ Trump Tower ស្ថានីយ៍រថភ្លើងធំៗ ដូចជាស្ថានីយ៍ Penn Station ព្រមទាំងទីតាំងជាច្រើនកន្លែងទៀតនៅទូទាំងទីក្រុង។

នៅប៉ុន្មានថ្ងៃមុនថ្ងៃខួបនៃការវាយប្រហារថ្ងៃទី៦ ខែមករា ឆ្នាំ២០២១ លើវិមានកាពីតូលរបស់សហរដ្ឋអាមេរិក អង្គភាព FBI បានចេញផ្សាយវីដេអូថ្មី អំពីករណីបំផ្ទុះបំពង់បង្ហូរប្រេងដែលនៅពុំទាន់ត្រូវបានដោះស្រាយ ។