ក្រុមអ្នកតវ៉ាប្រឆាំងប្រធានាធិបតីដែលត្រូវបានដាក់ការចោទប្រកាន់ លោក Yoon Suk Yeol បានចេញធ្វើបាតុកម្ម នៅថ្ងៃសៅរ៍ ទី៤ ខែមករា នេះ ដែលបានជួបប្រទះការទប់ស្កាត់របស់នគរបាល នៅលើដងផ្លូវទៅកាន់លំនៅឋានរបស់ប្រធានាធិបតី ក្នុងទីក្រុងសេអ៊ូល។

នគរបាល បានរារាំងក្រុមបាតុករដែលកំពុងគ្រវីទង់ជាតិ ក្នុងអំឡុងពេលធ្វើបាតុកម្មទៅកាន់លំនៅឋាននផ្លូវការរបស់ លោក Yoon មួយថ្ងៃបន្ទាប់ពីឆ្មាំប្រធានាធិបតីកូរ៉េខាងត្បូង និងកងទ័ព បានរារាំងអាជ្ញាធរ មិនឲ្យចាប់ខ្លួនប្រធានាធិបតីដែលត្រូវបានដាក់ការចោទប្រកាន់ នៅក្នុងការប្រឈមមុខដាក់គ្នាដ៏តានតឹងរយៈពេល៦ម៉ោង នៅខាងលំនៅឋានរបស់លោក Yoon នៅចំកណ្តាលទីក្រុង សេអ៊ូល។

លោក Yoon កំពុងស្ថិតក្រោមការស៊ើបអង្កេតបទព្រហ្មទណ្ឌសម្រាប់ការបះបោរ ជុំវិញបំណងដាក់ច្បាប់អាជ្ញាសឹក កាលពីថ្ងៃទី៣ ខែធ្នូ ដែលបានធ្វើឱ្យប្រទេសកូរ៉េខាងត្បូងជួបភាពភ្ញាក់ផ្អើល និងនាំឱ្យមានដីកាចាប់ខ្លួនជាលើកដំបូងដែលត្រូវបានចេញសម្រាប់ប្រធានាធិបតី។

ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បាននិយាយនៅក្នុងសេចក្តីថ្លែងការណ៍ថា «វាត្រូវបានវិនិច្ឆ័យថា ពុំអាចទៅរួចនោះទេក្នុងការអនុវត្តដីកាចាប់ខ្លួនដោយសារតែមានការប្រឈំមុខដាក់គ្នានៅបន្ត»។

ការរិយាល័យ បានលុបចោលកិច្ចខិតខំប្រឹងប្រែងដើម្បីចាប់ខ្លួន លោក Yoon ហើយដោយសារការព្រួយបារម្ភអំពីសុវត្ថិភាពបុគ្គលិករបស់ខ្លួន ការិយាល័យនេះបាននិយាយថា «មានការសោកស្តាយយ៉ាងខ្លាំង» ចំពោះការមិនគោរពតាម របស់លោក Yoon ។