ប្រទេសចិន ថ្មីៗនេះ កំពុងទប់ទល់ជាមួយនឹងការផ្ទុះឡើងនៃមេរោគផ្លូវដង្ហើមថ្មីឈ្មោះថា HMPV រយៈពេលប្រាំឆ្នាំបន្ទាប់ពីការរាតត្បាតកូវីដ១៩។ របាយការណ៍ និងការបង្ហោះតាមប្រព័ន្ធផ្សព្វផ្សាយសង្គមបង្ហាញថា មេរោគកំពុងរីករាលដាលយ៉ាងឆាប់រហ័ស ដោយអ្នកខ្លះអះអាងថាមន្ទីរពេទ្យ និងកន្លែងបូជាសពច្រើនពោរពេញដោយអ្នករងគ្រោះពីជំងឺនេះ។ វីដេអូដែលបានចែករំលែកតាមអ៊ីនធឺណិត បង្ហាញពីមន្ទីរពេទ្យមានមនុស្សច្រើន ដោយគណនីបណ្ដាញសង្គមមួយចំនួននិយាយថា មានមេរោគជាច្រើនដូចជាផ្តាសាយធំ វីរុសHMPV និងកូវីដ១៩ ជាដើម។

មានការអះអាងថា ប្រទេសចិន បានប្រកាសដាក់ក្នុងភាពអាសន្ន ប៉ុន្តែមិនមានការបញ្ជាក់ពីរដ្ឋាភិបាលនោះទេ។ វីរុស HMPV ត្រូវបានគេដឹងថាបង្កឱ្យមានរោគសញ្ញាដូចជាជំងឺផ្ដាសាយ ហើយក៏អាចបង្ហាញរោគសញ្ញាស្រដៀងគ្នានឹងកូវីដ១៩ ដែរ។ មន្ត្រីសុខាភិបាលកំពុងតាមដានស្ថានការណ៍យ៉ាងដិតដល់ ខណៈមេរោគនេះបន្តរីករាលដាល។

ទន្ទឹមនឹងនេះ របាយការណ៍ព័ត៌មានរ៉យទ័រ បាននិយាយថា អាជ្ញាធរគ្រប់គ្រងជំងឺរបស់ប្រទេសចិន បាននិយាយកាលពីថ្ងៃសុក្រ (០៣ មករា) ថា ខ្លួនកំពុងសាកល្បងប្រព័ន្ធត្រួតពិនិត្យសម្រាប់ជំងឺរលាកសួតដែលមិនស្គាល់ប្រភព ជាមួយនឹងករណីជំងឺផ្លូវដង្ហើមមួយចំនួន ដែលរំពឹងថានឹងកើនឡើងក្នុងរដូវរងា ប៉ុន្តែមិនលើកឡើងជុំវិញការអះអាងពីការផ្ទុះឡើងថ្មីនេះទេ។

អ្នកជំនាញផ្លូវដង្ហើមនៅមន្ទីរពេទ្យទីក្រុងសៀងហៃ បានព្រមានសាធារណជនកុំឱ្យប្រើប្រាស់ថ្នាំប្រឆាំងមេរោគដោយងងឹតងងុល ដើម្បីប្រយុទ្ធប្រឆាំងនឹងមេរោគ HMPV ថ្មីនេះ ដែលមិនមានវ៉ាក់សាំងទេ ប៉ុន្តែរោគសញ្ញារបស់វាស្រដៀងនឹងជំងឺផ្តាសាយ៕