រដ្ឋមន្ត្រីការបរទេសអ៊ីរ៉ង់ លោក Seyyed Abbas Araghchi បាននិយាយក្នុងបទសម្ភាសន៍មួយជាមួយប្រព័ន្ធផ្សព្វផ្សាយចិន CMG ដែលបានចាក់ផ្សាយកាលពីថ្ងៃសុក្រ (០៣ មករា) ថា សហរដ្ឋអាមេរិក និងបណ្តាប្រទេសលោកខាងលិចផ្សេងទៀតភាគច្រើន បានបិទភ្នែកមិនអើពើនឹងសកម្មភាពសង្រ្គាមរបស់អ៊ីស្រាអែល នៅតំបន់ហ្កាហ្សាស្ទ្រីប ហើយបានគេចចេញពីការទទួលខុសត្រូវផ្នែកច្បាប់ និងសីលធម៌របស់ពួកគេ។

លោក Araghchi បានសង្កត់ធ្ងន់ថា អ៊ីរ៉ង់ បើកចំហចំពោះការគាំទ្រកិច្ចព្រមព្រៀងឈប់បាញ់ណាមួយរវាងក្រុមហាម៉ាស និងអ៊ីស្រាអែល ដរាបណាវាត្រូវបានទទួលយកដោយប៉ាឡេស្ទីន។ រដ្ឋមន្រ្តីការបរទេសអ៊ីរ៉ង់រូបនេះ ក៏បានអំពាវនាវឱ្យសហគមន៍អន្តរជាតិដាក់សម្ពាធលើបណ្តាប្រទេសលោកខាងលិច និងអ៊ីស្រាអែល ឱ្យពន្លឿនបទឈប់បាញ់មួយ ដើម្បីបញ្ឈប់ការស្លាប់ និងរបួសដែលកំពុងបន្តនៅតំបន់ហ្កាហ្សា។

អាជ្ញាធរសុខាភិបាលដែលមានមូលដ្ឋាននៅហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា ចំនួនអ្នកស្លាប់របស់ប៉ាឡេស្ទីន ពីការវាយប្រហារដែលកំពុងបន្តរបស់អ៊ីស្រាអែល លើតំបន់ហ្កាហ្សាស្ទ្រីប បានកើនឡើងដល់ជាង ៤៥.៦០០នាក់ និងប្រមាណ ១០៨.៦០០នាក់ផ្សេងទៀតបានរងរបួស។

ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស បានរាយការណ៍នៅថ្ងៃសុក្រដដែលថា កងកម្លាំងការពារអ៊ីស្រាអែល បន្តបំផ្លាញមន្ទីរពេទ្យនៅភាគខាងជើងហ្កាហ្សា ដោយទុកឱ្យជនជាតិប៉ាឡេស្ទីនប្រហែល ៤០.០០០នាក់ មិនអាចទទួលបានសេវាវេជ្ជសាស្រ្ត៕