ភ្លៀងធ្លាក់ខ្លាំងជាច្រើនថ្ងៃបានធ្វើឱ្យទុក្ខវេទនារបស់ប្រជាជនភៀសខ្លួនប៉ាឡេស្ទីននៅតំបន់ហ្កាហ្សា កាន់តែអាក្រក់ទៅៗ ស្របពេលមានជម្លោះដែលកំពុងបន្ត ទឹកជំនន់ និងការបំផ្លិចបំផ្លាញតង់ស្នាក់នៅបណ្តោះអាសន្នរបស់ពួកគេ។ ជាងមួយឆ្នាំចាប់តាំងពីការផ្ទុះឡើងនៃជម្លោះអ៊ីស្រាអែល-ប៉ាឡេស្ទីន ពលរដ្ឋហ្កាហ្សា នៅតែមិនមានលំនៅស្ថានស្នាក់នៅត្រឹមត្រូវ ហើយពួកគេបានស៊ូទ្រាំនឹងស្ថានភាពរស់នៅដ៏លំបាកនៅក្នុងតង់បណ្ដោះអាសន្ន។

យោងតាមទីភ្នាក់ងារការពារជនស៊ីវិលប៉ាឡេស្ទីន បានឱ្យដឹងថា ទឹកជំនន់ពីភ្លៀងធ្លាក់ខ្លាំងបានកើនឡើងជាង ៣០សង់ទីម៉ែត្រ នៅជំរំតង់ក្នុងតំបន់ដែលរងផលប៉ះពាល់យ៉ាងធ្ងន់ធ្ងរ ដែលធ្វើឱ្យជនភៀសខ្លួនត្រូវប្រឈមនឹងភាពត្រជាក់ និងបំផ្លាញទីជម្រកដ៏ទ្រុឌទ្រោមរបស់ពួកគេ។

សេវាសង្គ្រោះបន្ទាន់រាយការណ៍ថា តំបន់ជាច្រើន រួមទាំងភាគខាងត្បូង ភាគខាងជើង និងកណ្តាលហ្កាហ្សាស្ទ្រីប បានក្លាយទៅជាកន្លែងដែលមនុស្សមិនអាចរស់នៅបានដោយសារតែទឹកជំនន់។ រដូវរងានៅតែជារដូវកាលដ៏លំបាកបំផុតសម្រាប់ជនភៀសខ្លួនជាង ១,៩លាននាក់ ដោយសារតង់របស់ពួកគេផ្តល់ការការពារតិចតួចណាស់ពីលក្ខខណ្ឌអាកាសធាតុដ៏អាក្រក់។

ជំនន់ទឹកភ្លៀងបានជន់លិចតង់ដ៏ផុយស្រួយ ពូកចាស់ៗ និងសំលៀកបំពាក់រហែក ធ្វើឱ្យគ្រួសារហ្កាហ្សា ជួបការលំបាកក្នុងអាកាសធាតុដ៏ត្រជាក់ ជាពិសេសសម្រាប់កូនៗរបស់ពួកគេ៕