អ៊ីស្រាអែល និងក្រុមហាម៉ាស កាលពីថ្ងៃអាទិត្យ (០៥ មករា) បានប៉ះទង្គិចពាក្យសម្ដីជុំវិញព័ត៌មានលម្អិតនៃកិច្ចព្រមព្រៀងបញ្ឈប់ការប្រយុទ្ធគ្នានៅតំបន់ហ្កាហ្សាស្ទ្រីប និងការដោះលែងចំណាប់ថ្នូរ ដោយបង្កើតឧបសគ្គបន្ថែមសម្រាប់បទឈប់បាញ់ ខណៈមន្ត្រីប៉ាឡេស្ទីន និយាយថា ការបន្តទម្លាក់គ្រាប់បែករបស់អ៊ីស្រាអែល កាន់តែខ្លាំងក្លា បានសម្លាប់មនុស្សជាង ១០០នាក់ កាលពីចុងសប្តាហ៍។

មន្ត្រីហាម៉ាស និយាយថា ក្រុមរបស់ខ្លួនបានអនុម័តបញ្ជីឈ្មោះចំណាប់ថ្នូរអ៊ីស្រាអែល ៣៤នាក់ ដែលត្រូវដោះលែងជាផ្នែកមួយនៃកិច្ចព្រមព្រៀងដែលអាចនាំទៅដល់បទឈប់បាញ់នៅទីបំផុត ប៉ុន្តែការិយាល័យលោកនាយករដ្ឋមន្ត្រី Benjamin Netanyahu បានចេញសេចក្តីថ្លែងការណ៍ភ្លាមៗថា ក្រុមហាម៉ាស មិនបានផ្តល់បញ្ជីចំណាប់ថ្នូរអ្វីទេ។

ការជំរុញជាថ្មីលើកិច្ចចរចាកំពុងដំណើរការដើម្បីឈានដល់បទឈប់បាញ់ក្នុងសង្គ្រាមរយៈពេល ១៥ខែរវាងអ៊ីស្រាអែល និងក្រុមហាម៉ាស និងការដោះលែងចំណាប់ថ្នូរអ៊ីស្រាអែល ដែលត្រូវបានចាប់ខ្លួនទៅកាន់តំបន់ហ្កាហ្សា មុនពេលលោកប្រធានាធិបតីជាប់ឆ្នោតរបស់សហរដ្ឋអាមេរិក Donald Trump ចូលកាន់តំណែងនៅថ្ងៃទី២០ ខែមករា។

កិច្ចខិតខំប្រឹងប្រែងនេះកើតមានស្របពេលមានកំណើនសកម្មភាពយោធារបស់អ៊ីស្រាអែល នៅក្នុងតំបន់ហ៊ុមព័ទ្ធ ដោយក្រុមគ្រូពេទ្យនិយាយថា កាលពីចុងសប្តាហ៍នេះ ការវាយប្រហារតាមអាកាសរបស់អ៊ីស្រាអែល នៅហ្កាហ្សា បានសម្លាប់ជនជាតិប៉ាឡេស្ទីនយ៉ាងហោច ១០៥នាក់ ។ ខាងយោធាអ៊ីស្រាអែល និយាយថា ខ្លួនបានសម្លាប់ពួកសកម្មប្រយុទ្ធហាម៉ាស រាប់សិបនាក់ក្នុងការវាយប្រហារទាំងនោះ៕