ប្រទេសរុស្ស៊ី បានប្រកាសភាពអាសន្នក្នុងតំបន់កាលពីថ្ងៃសៅរ៍ (០៤ មករា) នៅតំបន់គ្រីម៉េ (Crimea) ដែលខ្លួនបានរឹបអូសពីអ៊ុយក្រែន ក្នុងឆ្នាំ២០១៤ ខណៈកម្មករបានបន្តសម្អាតដីខ្សាច់ និងដីកខ្វក់រាប់តោននៅឆ្នេរនៃច្រកសមុទ្រ Kerch បន្ទាប់ពីមានការលេចធ្លាយប្រេងនៅក្នុងសមុទ្រខ្មៅកាលពីខែមុន។

លោក Mikhail Razvozhaev អភិបាលក្រុង Sevastopol ដែលដំឡើងដោយរុស្ស៊ី បាននិយាយថា ដានថ្មីនៃការបំពុលតិចតួចទាមទារឱ្យមានការលុបបំបាត់ជាបន្ទាន់ និងបានប្រកាសគ្រាអាសន្ននៅក្នុងទីក្រុង ដោយផ្តល់អំណាចបន្ថែមទៀតដល់អាជ្ញាធរក្នុងការសម្រេចចិត្តយ៉ាងរហ័សដូចជាការបញ្ជាឱ្យពលរដ្ឋជម្លៀសពីផ្ទះសម្បែងជាដើម។

ក្រសួងសង្គ្រោះបន្ទាន់បាននិយាយកាលពីថ្ងៃសៅរ៍ថា ពេលនេះក្រុមជួយសង្គ្រោះបានសម្អាតដីខ្សាច់ និងដីកខ្វក់ជាង ៨៦.០០០តោន ប៉ុន្តែការសម្អាតទាំងស្រុងនៅត្រូវការពេលបន្ថែម។ ប្រេងបានលេចធ្លាយចេញពីនាវាដឹកប្រេងដ៏ចំណាស់ចំនួនពីរគ្រឿង ដែលត្រូវខ្យល់ព្យុះវាយប្រហារកាលពីថ្ងៃទី១៥ ខែធ្នូ ដោយនាវាមួយគ្រឿងបានលិច និងមួយគ្រឿងទៀតបានកឿង។

មនុស្សជាង ១០.០០០នាក់ បាននិងកំពុងធ្វើការសម្អាតប្រេងចេញពីឆ្នេរខ្សាច់ទាំងក្នុង និងជុំវិញរមណីយដ្ឋានរដូវក្តៅ Anapa ដ៏ពេញនិយម។ ក្រុមបរិស្ថានបានរាយការណ៍ពីការស្លាប់របស់សត្វសមុទ្រជាច្រើនក្បាល និងប៉ះពាល់ដល់អ្នកស្រុកជាច្រើនគ្រួសារ៕