ជាមួយនឹងសម្ព័ន្ធមិត្តរបស់ប្រធានាធិបតីជាប់ឆ្នោតអាមេរិក លោក Donald Trump កំពុងស្ថិតក្នុងសង្គ្រាមពាក្យសម្ដីដោយបើកចំហមុនពេលលោកចូលកាន់តំណែង ក្រុមអ្នកវិភាគមើលឃើញថា អរិភាពចុងក្រោយបំផុតរវាងអ្នកគាំទ្រមហាសេដ្ឋីរបស់លោក Trump និងប្រជាជនវណ្ណៈការងារ ជាការបង្ហាញជាមុននូវភាពតានតឹង ដែលគំរាមកំហែងដល់ការបំបែកសម្ព័ន្ធភាពដ៏ផុយស្រួយរបស់លោក និងបង្កភាពវឹកវរជាថ្មីនៅអាមេរិក។

ការខឹងសម្បារអំពីសំណួរថា តើត្រូវស្វាគមន៍បុគ្គលិកបរទេសដែលមានជំនាញស្រាប់ឬទេ បានលាតត្រដាងពីការខ្វែងគំនិតគ្នាដ៏ជ្រៅរវាងក្រុមប្រឆាំងជនអន្តោប្រវេសន៍ដែលគាំទ្រលោក Trump តាំងពីដំបូង និង "សម្ព័ន្ធមិត្តបច្ចេកវិទ្យា" ដែលបានចំណាយទ្រព្យសម្បត្តិសន្ធឹកសន្ធាប់ក្នុងការទទួលបានជ័យជម្នះការបោះឆ្នោតឡើងវិញរបស់បក្សសាធារណរដ្ឋ។

ដោយកំពុងប្រថុយក្លាយទៅជាភាពច្របូកច្របល់មិនអាចស្រោចស្រង់បាន ភាពតានតឹងនេះបានជំរុញឱ្យមានការងឿងឆ្ងល់ទៅលើឃ្លាយុទ្ធនាការ "ធ្វើឱ្យអាមេរិកអស្ចារ្យម្តងទៀត" ឬហៅខ្លីថា MAGA របស់លោក Trump ក្នុងអ្វីដែលគេមើលឃើញថា ជាភាពមិនសមហេតុផលនៃចលនាប្រជានិយម ប៉ុន្តែបែរជាអ្នកមានទ្រព្យសម្បត្តិជាអ្នកសម្រេចគ្រប់រឿងទៅវិញ។

អ្នកវិភាគនយោបាយ លោក Flavio Hickel បានប្រាប់សារព័ត៌មាន AFP ថា "យើងគិតថាសង្រ្គាមពាក្យសម្ដីថ្មីបំផុតក្នុងចំណោមអ្នកគាំទ្រលោក Trump ជាពិសេសមហាសេដ្ឋី Elon Musk គឺជាការចាប់ផ្ដើមនៅក្នុងការប្រយុទ្ធដ៏យូរអង្វែងអំពីអនាគតនៃចលនា MAGA ដែលអាចនាំឱ្យមានចលាចលក្នុងប្រទេស"។

អ្នកវិភាគមួយចំនួនបានព្យាករថា ការមើលងាយស្ថានការណ៍នឹងជារឿងមិនល្អសម្រាប់លោក Elon Musk ដោយសារលោក Trump ដឹងយ៉ាងច្បាស់ថា អំណាចពិតប្រាកដរបស់លោកគឺតែងតែស្ថិតនៅក្នុងការគាំទ្រពីបណ្ដាប្រជាជនវណ្ណៈការងារ៕