អង់គ្លេស៖ រដ្ឋាភិបាលអង់គ្លេសនិយាយថា បណ្ដាប្រទេសដែលប្រើប្រាស់ធ្យូងថ្មច្រើនរួមមានប្រទេសប៉ូឡូញ វៀតណាម និងឈីលីកំពុងប្ដេជ្ញាចិត្តផ្លាស់ប្ដូរពីការប្រើប្រាស់ឥន្ធនៈហ្វូស៊ីល នៅក្នុងការសន្យានៅឯជំនួបកំពូលស្ដីពីបម្រែបម្រួលអាកាសធាតុលើកទី២៦ របស់អង្គការសហប្រជាជាតិ។ ធ្យូងថ្មគឺជាកត្តាជំរុញដ៏ធំបំផុតតែមួយគត់ដល់បញ្ហាបម្រែបម្រួលអាកាសធាតុ។
ចក្រភពអង់គ្លេសនិយាយថា ប្រទេស និងអង្គការផ្សេងៗចំនួន ១៩០ បានប្ដេជ្ញាបញ្ឈប់ការប្រើប្រាស់ធ្យូងថ្ម។ ប៉ុន្តែប្រទេសមួយចំនួនដែលពឹងផ្អែកយ៉ាងធំបំផុតលើរ៉ែធ្យូងថ្មរបស់ពិភពលោក រួមទាំងប្រទេសអូស្ត្រាលី ឥណ្ឌា ចិន និងសហរដ្ឋអាមេរិកពុំបានចុះហត្ថលេខាលើការប្ដេជ្ញាចិត្តនោះទេ។ ម្ចាស់ហត្ថលេខីនៃកិច្ចព្រមព្រៀងនេះបានប្ដេជ្ញាបញ្ចប់រាល់ការវិនិយោគទាំងអស់ នៅក្នុងជំនាន់ថាមពលធ្យូងថ្មថ្មីទាំងក្នុងប្រទេស និងនៅលើពិភពលោក។ ចក្រភពអង់គ្លេសនិយាយថា មេដឹកនាំទាំងនោះក៏បានស្វាគមន៍ផងដែរ ចំពោះការបញ្ឈប់ការប្រើប្រាស់ថាមពលបានមកពីរ៉ែធ្យូងថ្មនៅក្នុងត្រឹមឆ្នាំ២០៣០ សម្រាប់វិស័យសេដ្ឋកិច្ចសំខាន់ៗ និងនៅត្រឹមឆ្នាំ២០៤០ សម្រាប់ប្រទេសក្រីក្រ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
