រដ្ឋមន្ត្រីការបរទេសស៊ូដង់ បាននិយាយថា ប្រមុខកងទ័ពរបស់ប្រទេសនេះ បានស្វាគមន៍ការយល់ព្រមរបស់ទួរគីដើម្បីដោះស្រាយជម្លោះដ៏ឃោរឃៅរយៈពេល ២០ខែ រវាងកងកម្លាំងរបស់លោក និងគូប្រជែងយោធារបស់ពួកគេ។

នៅដើមខែធ្នូនេះ ប្រធានាធិបតីទួរគី រ៉េសិប តាយីប អឺដូហ្កាន់ (Recep Tayyip Erdogan) បាននិយាយនៅក្នុងការសន្ទនាតាមទូរស័ព្ទជាមួយលោក Abdel Fattah Al-Burhan របស់ប្រទេសស៊ូដង់ថា ទីក្រុងអង់ការ៉ា អាចជួយបង្កើត «សន្តិភាព និងស្ថិរភាព» នៅក្នុងរដ្ឋអាហ្វ្រិក ដែលហែកហួរដោយសង្រ្គាមនេះ។

រដ្ឋមន្ត្រីការបរទេសស៊ូដង់លោក Ali Youssef បានថ្លែងនៅក្នុងសន្និសីទមួយ បន្ទាប់ពីកិច្ចប្រជុំថា នៅក្នុងកិច្ចប្រជុំមួយក្នុងទីក្រុងកំពងផែ Port Sudan កាលពីថ្ងៃសៅរ៍ លោក Burhan បានស្នើឲ្យអនុរដ្ឋមន្ត្រីការបរទេសរបស់ប្រទេសទួរគី លោក Burhanettin Duran ពាំនាំយកនូវ«ការស្វាគមន៍របស់ថ្នាក់ដឹកនាំស៊ូដង់ចំពោះគំនិតផ្តួចផ្តើមនេះ» ជូនលោកប្រធានាធិបតី អឺដូហ្កាន់។ 

លោក Youssef បាននិយាយថា៖«ស៊ូដង់ត្រូវការបងប្អូន និងមិត្តភ័ក្តិដូចជាប្រទេសទួរគី ដោយបន្ថែមថា «គំនិតផ្តួចផ្តើមនេះ អាចនាំទៅរក... ការសម្រេចបានសន្តិភាព នៅក្នុងប្រទេសស៊ូដង់»។

លោក អឺដូហ្កាន់ បាននិយាយនៅក្នុងការសន្ទនាតាមទូរស័ព្ទកាលពីខែធ្នូរបស់ខ្លួន ជាមួយលោក Burhan ថា ប្រទេសទួរគី «អាចឈានជើងចូលក្នុងការដោះស្រាយជម្លោះ» និងរារាំងប្រទេសស៊ូដង់ពីការ «ក្លាយជាតំបន់នៃអន្តរាគមន៍ពីខាងក្រៅ»។ នេះបើយោងតាមសេចក្តីថ្លែងការណ៍ពីការិយាល័យប្រធានាធិបតីទួរគី។