​បាល់ទាត់៖ ​ក្រុមបាល់ទាត់ Kawasaki Frontale បាន​ធានា​ពិន្ទុ​ដាច់​គេ​ដើម្បី​គ្រង​ជើងឯក​លី​គ​កំពូល​ជប៉ុន J1-League ទៅហើយ​ក្រោយ​ស្មើគ្នា​ជាមួយ Urawa Reds Diamond ១-១ ថ្ងៃ​ពុធ​ម្សិលមិញ​។ ​​ក្រុម​ម្ចាស់ផ្ទះ Kawasaki មានឱកាស​រកបាន​គ្រាប់​នាំមុខ​មុន​នៅ​នាទី​ទី៣៣ ដោយ​កីឡាករ​ប្រេ​ស៊ី​ល Jesiel មុន​ពេលដែល​ក្រុម​ភ្ញៀវ Urawa Reds Diamond តាម​ស្មើ​វិញ​នៅ​នាទី​ទី៨៩ ហៀបនឹង​ចប់​ការប្រកួត​ទៅហើយ​ដោយ Hiroki Sakai​។

​​មួយ​ពិន្ទុ​នេះ​គ្រប់គ្រាន់​ទៅហើយ​សំរាប់​ក្រុម​ការពារ​តំណែង​ជើងឯក​មួយ​នេះ ដើម្បី​គ្រង​ជើងឯក​រដូវ​កាល​នេះ​ទោះ​នៅសល់ ៤ប្រកួត​ទៀត​ទើប​ចប់​រដូវ​កាល​ក៏ដោយ​។ ​គិត​ត្រឹម​សប្តាហ៍​ទី៣៤ នេះ Kawasaki Frontale នាំមុខ​ដាច់​ក្រុម​លេខ២ Yokohama F. Marinos ដល់​ទៅ ១៣ពិន្ទុ​ពោលគឺ Yokohama បាន​រង​បរាជ័យ​នៅ​ថ្ងៃ​ពុធ​ម្សិលមិញ​នេះ​ក្នុង​ទឹកដី​ខ្លួនឯង ​ក្រោម​ថ្វី​ជើង​ក្រុម​ភ្ញៀវ Gamba Osaka ១-០​។ ​​សូមបញ្ជាក់ថា Kawasaki Frontale ដែល​ស្ថិតក្រោម​ការដឹកនាំ​រប​ស់លោក Toru Oniki ក្រោយ​លេង​បាន ៣៤ប្រកួត​នេះ​ចាញ់​តែ ១​ប្រកួត​ប៉ុណ្ណោះ​ក្រៅពីនោះ​ឈ្នះ ២៦ប្រកួត​ស្មើ ៧ប្រកួត​។ ​​រយៈពេល ៥ឆ្នាំ​ចុង​ក្រោយនេះ Kawasaki Frontale បាន​គ្រប់គ្រង​ពាន J1-League នេះចំនួន ៤​លើក​ដែល​រួមមាន​ឈ្នះ ២​ឆ្នាំ​ជាប់​គ្នា​នៅ​ឆ្នាំ២០១៧ និង ២០១៨ មុន​ឈ្នះ​ពីរលើក​ជាប់​គ្នា​ទៀត​នៅ​ឆ្នាំ២០២០ និង ២០២១ លើកលែងតែ​ឆ្នាំ២០១៩ ដែល Yokohama F. Marinos ជា​ជើងឯក​៕

​អត្ថបទ​៖​នាង សុភា​វុ​ធ