រដ្ឋមន្ត្រីការបរទេសអាមេរិក លោក Antony Blinken នៅថ្ងៃចន្ទ (ទី៦ ខែមករា) នេះ បាននិយាយថា ទីក្រុងវ៉ាស៊ីនតោនចង់ឃើញកិច្ចព្រមព្រៀងបទឈប់បាញ់ នៅតំបន់ហ្កាហ្សា ត្រូវបានបញ្ចប់ទាំងស្រុង ហើយចំណាប់ថ្នូរទាំងអស់ មានសេរីភាព ក្នុងរយៈពេល ២សប្តាហ៍ខាងមុខនេះ។

គួរបញ្ជាក់ថា ការជំរុញជាថ្មី កំពុងដំណើរការទៅ ដើម្បីឲ្យបានឈានដល់បទឈប់បាញ់ ក្នុងសង្គ្រាម រវាងអ៊ីស្រាអែល និងក្រុមហាម៉ាស និងដើម្បីឲ្យចំណាប់ថ្នូរបានវិញត្រឡប់មកជួបជុំគ្រួសារវិញ មុនពេលប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ចូលកាន់តំណែង នៅថ្ងៃទី២០ ខែមករា។

អំឡុងសន្និសីទសារព័ត៌មាន នៅប្រទេសកូរ៉េខាងត្បូង នៅពេលត្រូវបានសួរថា តើកិច្ចព្រមព្រៀងបទឈប់បាញ់ជិតកើតមានហើយមែនទេ លោក Blinken បានឆ្លើយតបថា៖ «យើងពិតជាចង់ខ្លាំងណាស់ ក្នុងការបញ្ចប់រឿងនេះទាំងស្រុង ក្នុងរយៈពេល ២សប្តាហ៍ខាងមុខ ជាពេលវេលាដែលយើងនៅសល់»។

លោក Blinken ដែលបានព្យាយាមម្តងហើយម្តងទៀត និងមិនបានជោគជ័យកាលពីឆ្នាំមុន ដើម្បីឈានដល់បទឈប់បាញ់ រវាងក្រុមហាម៉ាស និងអ៊ីស្រាអែល បាននិយាយថា រដ្ឋបាលរបស់លោក Joe Biden នឹងធ្វើការរៀងរាល់នាទីរៀងរាល់ថ្ងៃ រហូតដល់ចុងបញ្ចប់នៃអាណត្តិរបស់ខ្លួន ដើម្បីទទួលបានកិច្ចព្រមព្រៀងចំណាប់ថ្នូរ៕