ការវាយប្រហារដោយការបាញ់ប្រហារលើរថយន្តក្រុងដែលដឹកជនជាតិអ៊ីស្រាអែល នៅតំបន់វេសបែង( West Bank) ដែលគ្រប់គ្រងដោយអ៊ីស្រាអែល បានសម្លាប់មនុស្សយ៉ាងតិច ៣នាក់។

សេវាជួយសង្គ្រោះ Magen David Adom របស់អ៊ីស្រាអែល បាននិយាយថា យ៉ាងហោចណាស់មនុស្ស ៦ នាក់ផ្សេងទៀត បានរងរបួស នៅក្នុងការវាយប្រហារ នៅថ្ងៃចន្ទនេះ។

អំពើហិង្សា បានកើនឡើងនៅតំបន់វេបែង ចាប់តាំងពីការវាយប្រហាររបស់ក្រុមហាម៉ាស កាលពីថ្ងៃទី ០៧ ខែតុលា ឆ្នាំ ២០២៣ ចេញពីតំបន់ហ្កកាហ្សា បានបង្កឲ្យមានសង្រ្គាម ដែលកំពុងបន្តនៅទីនោះ។

ការវាយប្រហារនេះ បានកើតឡើង នៅក្នុងភូមិ Al-Funduq របស់ប៉ាឡេស្ទីន នៅលើផ្លូវធំមួយ ពីខាងកើតទៅខាងលិច ឆ្លងកាត់ទឹកដីនេះ។ អត្តសញ្ញាណរបស់អ្នកវាយប្រហារនោះ និងអ្នកស្លាប់ មិនត្រូវបានគេដឹងភ្លាមៗ នោះទេ។

អ៊ីស្រាអែល បានដណ្តើមយកតំបន់វេសបែងមកគ្រប់គ្រង នៅក្នុងសង្រ្គាមមជ្ឈិមបូព៌ាឆ្នាំ ១៩៦៧ ហើយប៉ាឡេស្ទីន ចង់ឲ្យតំបន់នេះ ក្លាយជាផ្នែកសំខាន់នៃរដ្ឋ នាពេលអនាគតរបស់ពួកគេ។

ប្រជាជនប៉ាឡេស្ទីនប្រហែល ៣លាននាក់ រស់នៅក្នុងតំបន់វេសបែង ក្រោមការគ្រប់គ្រងរបស់យោធាអ៊ីស្រាអែល ដែលហាក់ដូចជាបើកចំហ ដោយអាជ្ញាធរប៉ាឡេស្ទីនគ្រប់គ្រងមជ្ឈមណ្ឌលប្រជាជន។ អ្នកតាំងលំនៅជនជាតិអ៊ីស្រាអែលជាង ៥០០.000នាក់ រស់នៅក្នុងកន្លែងតាំងទីលំនៅជាច្រើន ដែលសហគមន៍អន្តរជាតិភាគច្រើនចាត់ទុកថា ខុសច្បាប់។