នាយករដ្ឋមន្ត្រីអ៊ីតាលី លោកស្រី Giorgia Meloni កាលពីថ្ងៃអាទិត្យ (ទី៥ ខែមករា) នេះ បាននិយាយថា លោកស្រីបានត្រៀមខ្លួនជាស្រេច ដើម្បីធ្វើការជាមួយលោក Donald Trump បន្ទាប់ពីបានធ្វើទស្សនកិច្ចដ៏គួរឲ្យភ្ញាក់ផ្អើលមួយទៅកាន់រដ្ឋ Florida ដើម្បីជួបជាមួយប្រធានាធិបតីជាប់ឆ្នោតរបស់សហរដ្ឋអាមេរិក មុនពេលចូលកាន់តំណែង នៅថ្ងៃទី២០ ខែមករា។

លោកស្រី Meloni ដែលបានដឹកនាំរដ្ឋាភិបាលចម្រុះស្តាំនិយម នៅប្រទេសអ៊ីតាលី ចាប់តាំងពីខែតុលា ឆ្នាំ២០២២ បានជួបជាមួយលោក Trump នៅឯភូមិគ្រឹះ Mar-a-Lago របស់លោក កាលពីល្ងាចថ្ងៃទី៤ ខែមករា អំឡុងដំណើរទស្សនកិច្ចដែលមិនត្រូវបានប្រកាសជាមុន។

អមដោយការបង្ហោះនៅលើបណ្ដាញសង្គមជាមួយនឹងរូបថតរបស់លោកស្រី និងលោក Trump លោកស្រី Meloni បានសេរសេរថា៖ «ជាការមាននូវពេលល្ងាចដ៏គួររីករាយជាមួយ Donald Trump ដែលខ្ញុំសូមថ្លែងអំណរគុណ ចំពោះការស្វាគមន៍»។ ដោយមានទង់ជាតិអ៊ីតាលី និងសហរដ្ឋអាមេរិក លោកស្រីបានបន្ថែមនៅលើបណ្ដាញសង្គម X នោះថា៖ «ត្រៀមខ្លួនរួចរាល់ហើយ ដើម្បីធ្វើការជាមួយគ្នា»។

យ៉ាងណាក្ដី មិនមានព័ត៌មានលម្អិតនៃកិច្ចពិភាក្សានេះ ត្រូវបានចេញផ្សាយនោះទេ ប៉ុន្តែឧបនាយករដ្ឋមន្ត្រីអ៊ីតាលី លោក Matteo Salvini បាននិយាយថា ឥស្សរជនទាំង២ បានជជែកគ្នាពីបញ្ហាជាច្រើន ក្នុងនោះរួមទាំងស្ថានភាពរបស់លោកស្រី Cecilia Sala អ្នកសារព័ត៌មានអ៊ីតាលីដែលត្រូវបានឃុំខ្លួន នៅប្រទេសអ៊ីរ៉ង់ ក្នុងខែធ្នូ ឆ្នាំ២០២៤៕